admin
Muchaneta Chimuka
MUTEVEDZERI wegurukota rezvekuburitswa kwemashoko nezvekutepfenyura, Cde Monica Mutsvangwa, vanoti madzimai ose ari nhengo dzedare reParamende anofanira kutsigira mutemo uri kuda kukumikidzwa uyo unoona nezvenyaya dzekuenzaniswa kwemikana pakati pevanhukadzi nevanhurume, weGender Commision Bill.
Vakataura mashoko aya nguva pfupi yadarika kuKadoma pamusangano wakaitwa nesangano reZimbabwe Women Lawyers Association (ZWLA). “Tinoda kuti madzimai munge muchibatana senhengo dzeParamende kuitira kuti muve vanhu vanorwira chinhu chimwe chete maringe nenyaya dzenyu zvinova zvinoita kuti chirongwa ichi chizadzikiswe. Tinoda kubatana pasina kutarisa kuti uyu ndewebato ripi kuitira kuti tibudirire,” vakadaro Cde Mutsvangwa. Vakati donzvo ravo nderekuti vange vachifambirana nezviri mubumbiro idzva remutemo wenyika pakurwira kodzero dzevanhukadzi.
“Ibasa remadzimai ari muParamende kuti akotsvere chirongwa ichi kuitira kuti Gender Commission Bill ringe richizopasiswa kuti rive mutemo. Chirongwa ichi chakaparurwa mumwedzi waChikunguru gore rapera,” vakadaro.
Vachitaura pachiitiko chimwe chete ichi, Deputy Speaker wedare reNational Assembly, Cde Mabel Chinomona, vakakurudzira kushanda pamwe chete mukurwira kodzero dzevanhukadzi.
“Paramende paichagara muchikamu chechisere (Second Session of the Eighth Parliament) vanhu vemuZimbabwe vanenge vari kutarisira kuti mitemo inge ichikumikidzwa nekukasika,” vakadaro.
Online Reporter