admin
MUIMBI weJazz ari kusimukira, Costa Mhesvumutamba — uyo anozivikanwa saBhomba Chikara — anoti zvakakosha kuti vatsigiri vemusambo uyu vautsigire zvizere sezvo pari zvino uri kudzikira zvikuru. Bhomba Chikara, uyo anotsigirwa nechikwata cheBlack Eye Band, anoti misambo yakaita seSungura neZim-dancehall iri kuita mukurumbira nemashoo asi Jazz iri kusarira kumashure.
“Isu vaimbi veJazz tiri kusarira kumashure nekuti rutsigiro rwatiri kuwana rushoma kana takatarisa mimwe misambo ine chaunga muno.
“Vashoma vaimbi veJazz vanoyemurwa muno vakaita saOliver Mtukudzi uyo agara kubva nakare ndiye anongofarirwa nevatsigiri vemusambo uyu.
“Isu tiri kusimukira tine chishuvo chekuti musambo uyu ufarirwe sezviri kuitwa mimwe misambo,” anodaro Bhomba Chikara.
Kubva paakatanga kuimba, Bhomba Chikara atsikisa madambarefu matatu anoti Nhava (2013), Riva (2015) naNgoma Kurira (2016) uye achangobva kubura DVD reNgoma Kurira.
Muimbi uyu anoti mhanzi yake inodzidzisa zvezvetsika nemagariro. Anoti akakurira mumhuri inoremekedza kuve nehunhu hwakanaka izvo zvinove zvinomutuma kutsikisa nziyo dzinokurudzira tsika nemagariro anoyemurika.
“Mutsika nemagariro edu, tinoda hunhu hwakanaka kana uchida kugarisana nevamwe zvakanaka saka zvakandikoshera ini muhupenyu hwangu.
“Ndakakura ndichidzidziswa hunhu hwakanaka kwandakabva ndosaka ndichiimba nziyo dzine chekuita netsika nemagariro,” anodaro Bhomba Chikara.
Anoti ari kutarisira kuita mashoo munguva inotevera sezvo parizvino ari kumhanya-mhanya kutsvaga midziyo yekushandiswa yakaita semagitare.
Online Reporter