Online Reporter
Ethel Ncube
ABALANDELI bomculo ka-Aphiwe loSobancane sebelindele ukwamukela idlalade elitsha elivela kubahlabeleli bobabili, elikhangelelwe ukwethulwa ngoMpandula.
Kudlalade elitsha, elithi Funda ukwamukela eliphekwe eSouth Africa, abahlabeleli laba babike ukuba kuzaduma uMaskandi kujabule abanengi.
Babike ukuba ukubekezela kwabalandeli babo kuzabhadala ngoba kunsukwana ezilandelayo, bazabe bekholisa ngomculo omutsha.
Loba u-Aphiwe loSobancane bedabuka koZimnyama, ePlumtree, eMatabeleland South, udumo lwabo selumemetheke ilizwe lonke, okutsho ukuba idlalade elitsha lizaqinisekisa ukuthi sebengosaziwayo kwezomculo.
Umaneja wabaculi laba, uHandsome Sibanda utshele iphephandaba likazulu ngoLwesibili ukuthi okwakhathesi baseSouth Africa lapho abasebenza lesinye i-studiyo kudlalade elitsha.
USibanda uthe konke kuqhuba kakuhle njalo okuseleyo yikuthi bethule umsebenzi omutsha ebantwini.
“U-Aphiwe loSobancane okwakhathesi bavakatshele eMzansi lapho abasanda kurekhoda idlalade labo elitsha.
Umsebenzi wokurekhoda bawugqibe ngoMvulo kuyonale iviki. Idlalade sizalethula ngoMpandula. Lilengoma eziyisitshiya galombili ezigoqela isihloko Funda Ukwamukela, NgoDecember, Uyabaleka, Ngiyakuthanda, Kweminye, Kwabanemali, Izidakamizwa lethi Uthando Lweqiniso. Sikhangelele ukuthi sikholisise abantu umnyaka lo usubanga emaphathelweni,” kutsho uHandsome.
Wazise ukuba abalandeli babo bazatshelwa ukuthi idlalade lizakwethula ngaphi.
“Ilanga lendawo yokwethula idlalade lizabikwa kumalanga alandelayo. Abalandeli sizabanika imininingwane egcweleyo. Kabahlale bethiye indlebe ngoba maduzane nje sizabe sijayiva ingoma ezintsha. Asilungiseni imali zokusekela umculo wabo ukuze labo bakhule njalo benelise ukuthenga okudingakalayo emculweni.
“Umculo nxa suthe waphuma sicela lilandele lakunkundla zokuxhumana liwulalele khona balandeli. Esikuphekayo sokuvuthwa asilindeni bathandi bomculo weMaskandi,” kutsho uSibanda.
