Online Reporter
Zimpapers Sports Hub
KUKHONA okukhulu okuzaphuma esigabeni seNkayi, eMatabeleland North kwezomdlalo wenguqu kuminyaka ezayo.
Lo ngumbono wenengi labahlali lamabhizimusi akulindawo kunye lalabo abakhulela khona, asebehlala kwezinye indawo. Ukuzimisela kwabantu beNkayi ukuphakamisa umdlalo wenguqu kuzabonakala ngokuqoqwa kumqhudelwano weNkayi Soccer Academy Youth Tournament ozabe ungoLwesihlanu langoMgqibelo.
Kuzadibana abafana abasacathula emdlalweni abaphuma kumaqembu abalisela iNkayi Soccer Academy, Highlanders, Somvubu Academy, Lupane City FC, Corinthias SOE, Super Eagles le-53 City Select.
Amantombazana lawo azancantisana kumbango wenkezo yesigaba. Kuhlandla leli kuzadlala iNkayi Soccer Academy, Sibanye, Amazwendaba Royal Queens, Lupane City, Somvunbu Academy leCorinthias SOE.
Okuzahlabusa kulumbuthano wemidlalo yikuba khona kwabadlali beHighlanders bekhokhelwa ngukaputeni u-Ariel “Mangoye” Sibanda. USibanda unxuswe ukuthi abengumhlonitshwa omkhulu, okunguye ozanikeza izicoco leminye imivuzo. Umdlali lo, osethole udumo, wazakhela ibizo njengonozinti oyingcitshi elizweni, kukhangelelwe ukuthi akhuthaze intsha yeNkayi lakundawo eziseduzane.
Imidlalo izabe isenkundleni zeNkayi High School.
Kusenjalo, kungxoxo leZimpapers Sports Hub ngoLwesithathu, abaqoqi bemidlalo bathe sebevumelane loSibanda ukuthi azophakamisa intsha yeNkayi ngokuba khona kwakhe.
Omunye wabaqoqi laba uBigboy “Mjimba” Moyo uthe: “Silokuthaba ukubika ukuthi sesifikile njalo isikhathi somncintiswano wethu weNkayi Football Tournament. Leli lihlandla lesibili lomncintiswano wethu. Umhlonitshwa kuzabe kungukaputeni weBosso u-Ariel Sibanda,” kutsho uMoyo laye odume kakhulu ngokuphathisa abasakhulayo kunhlangothi ezitshiyeneyo eNkayi.
Kubikwa kuzaqhutshwa i-road show esigabeni andubana kuqalwe imidlalo, ngenhloso yokukhuthaza abantu ukuthi bagcwalise inkundla yeNkayi High School.
UMoyo uthe inhloso ephambili ngalumncintiswano yikukhulisa abantwana abalethalenta kwezemidlalo, ukwenzela ukuthi babengumzekeliso kwabanye.
“Lapha sithi phakama Nkayi njengesigaba. Siphakamisa intsha yakulindawo ukuthi izimele, itshengisa ukuba eNkayi kulethalenta kunguqu. Lokhu kuzakuba ngumzekeliso ophezulu kwabanye ontanga.
“Kuyaziwa ukuthi ithalenta emaphandleni kwezemidlalo kalibonwa. Thina sizimisele ukuthi sinike abantwabethu ithuba lokubonisa ithalenta labo kuNkayi Football Tournament.”
Ukaputeni weHighlanders uthe: “Yikutshengisela uthando lwethu lokuphakamisa abafana abasilandelayo. Ilizwe liyakudinga lokhu.”
