admin
Yintatheli kaMthunywa
UPETER Nkomo umqeqetshi wabonozinti osanda kuxotshwa kuqembu lenguqu iHighlanders kubikwa ulakho ukuphenduka kulithimu ngoba kakho owazi ukulolonga onozinti.UNkomo uxotshwe ngesikhathi iHighlanders isehlukana loBongani Mafu obengumqeqetshi omkhulu ngoLwesine oludluleyo.
Kuliviki uMthunywa uzwe udletshana lokuthi abaqeqetshi abatsha uCosmas Zulu, uAmin Soma Phiri loMelusi Mabaleka bathwele nzima ukuqondisa onozinti bethimu.
“Kukhanya uOxo (Peter Nkomo) sebeke bamtshayela ucingo abadala beBosso, nxa kungakabi njalo, kutsho ukuthi bazakwenza kumalanga alandelayo. Esikwaziyo yikuthi kulequla lethu elivumelana lokuthi uOxo kumele aphenduke ngoba umdala lo ulolwazi lokulolonga onozinti,” kutsho inkokheli ephezulu kuHighlanders engafunanga ukuqanjwa ibizo.
UNkomo uhlonitshwa kakhulukazi ngokulolonga onozinti ababalisa uMaMkhwebu (Brighton Sibanda), uWashington Arubi loAriel Sibanda. UArubi waba ngumdlali owedlula bonke ngesizini yeCastle ngo2011, kuthi uSibanda uthole isicoco sokuba ngunozinti kuzwa ka2012.
UNkomo, obizwa ngelithi ‘‘Oxo’’ kulabo abamaziyo, okwamanje kalamsebenzi njalo nguye owake waphatha umsebenzi ofanayo kuFC Platinum ngesizini ka2011 aze afulathele iBosso.
Anduba aphenduke kuBosso kulisizini, umqeqetshi lo wayetshiye umsebenzi kulithimu walandela inengi lengcitshi zabadlali kuzimbamgodi zePlatinum edolobheni leZvishavane.
Ngaleso sikhathi iFC Platinum yayibhadala amaqubaquba emali njalo ithenga abadlali labaqeqetshi abazingcitshi kwamanye amathimu.
Online Reporter