admin
Yintatheli kaMthunywa
UMQEQETSHI weqembu le-AmaZulu uJoey Antipas useqinise ithimu yakhe ngensika yomgadli ozakhele udumo emaqenjini agijima kumaligi aphakemeyo kuleli laseAfrica.
UMthunywa ukuzwe ngokugcweleyo ukuthi uAntipas uzavakatshela kuleli kuyonale iviki elande ukuzosayina isivumelwano labadlali ababili loba kungasatholakalanga ngokugcweleyo ukuthi yibaphi abadlali labo.
Iphephandaba likazulu lixhumane loAntipas esedolobheni leDurban lapho avumbulule ukuthi bakhona abadlali abakumathimu eCastle Lager ababili abazadlala kuMaZulu ngenyanga ezayo.
“Ngiyeza ukuzodinga abadlali abathile kodwa angisoke ngitsho amagama abo ngoba asikabi leqiniso lokuthi kuzaphetha njani. Okunye yikuthi ngisafuna ukuqinisa iqembu ngimangalise izitha,” kutsho uAntipas.
Umqeqetshi lo wale wemba phansi ukutsho amabizo abadlali laba kodwa uMthunywa uzwe kubafakazi abaqotho ukuthi omunye wabadlali laba ukuqembu leChicken Inn.
Ngokuphuma kwembiko ebulenjini be-AmaZulu, umqeqetshi uAntipas uveze ukuthi eSouth Africa usethenge umgadli omkhulu uMabhuti Khenyeza.
UKhenyeza odume ku-Arrows, Mamelodi Sundowns, Ajax Cape Town leMpumalanga Black Aces besekulesikhatshana ezilolonga loSuthu ngenhloso yokuthola indawo yokudlala.
“Yebo uMabhuti uyeza eqenjini. Iqiniso elikhona yikuthi umdlali lo usesayinile lathi loba ngingelasiqiniseko sokuthi usayine isivumelwano esingakanani. UMabhuti uyiloluhlobo lomdlali ofela enkundleni. Nxa ethe walifuna ibhola uyalithola,” kutsho u-Antipas.
UAntipas uthe okumenza asabalale egcwalisa abadlali ku-AmaZulu yikuthi ulesifiso sokuthi iphenduke kuligi yeAbsa. Iqembu lakhe lakhitshwa kuligi ephakemeyo kumasizini amabili adluleyo. Ngesizini ephelileyo lehluleke kancane ukuthi libalekele iFirst National Division.
“Iligi ye-National First Division yisigaba esinzima kakhulu. Bengilokhu ngiyilandela imidlalo yayo ngesikhathi ngiseseZimbabwe (kuChicken Inn abeyilolonga). Ngiyazi ukuthi ngikhangelele umsebenzi omkhulu.
“Lokhe ngafika kuleliqembu, osekungihlabe umxhwele kubafana bami yikuthi bayalwa enkundleni. Bayalifuna ngamehlo abomvu ibhola.”
Kusenjalo, uAntipas uthwale inkezo yakhe yokuqala ngokufika eKwaZulu Natal ngokunqoba inkezo kasodolobho eyeThungulu Mayoral Cup. Iqembu leAmaZulu linqobe iLamontville Golden Arrows sekukhahlelwa imbekwa.
Online Reporter