adminYiNtatheli kaMthunywa
KULANDELA ukukhitshwa kodaba lwesigabeni seSilobela olwendoda okubikwa ibulewe kunye lendodana yayo kubangwa obabhemi kuviki ephelileyo sekuvele ukuba ababili laba babezama ukulamulela elinye ilunga lemuli.
Sokufike endlebeni zikaMthunywa ukuba uMoffat Dube, Lee Moyo kunye loMpilo Moyo bafika esigabeni seBhaparara bedinga uPhumulani Ncube bemethesa icala lokuba uhamba etshela abantu ukuba batshontsha ubabhemi wakhe.
Kubikwa abathathu laba bathi bebona uPhumulani bamhlala izithende baze bambamba baqala ukumhlasela.
UMthunywa uxhumane loPhumulani Ncube oveze ukuthi uHelikan Ncube kunye lendodana yakhe uKhulekani Ncube babezama ukulamulela yena baze behlelwe ngamashwa la.
“Satshontshelwa ubabhemi esibayeni senelisa ukubona umzila sawulandela kodwa sathi sesiphambili eSanta Maria umzila sangasawuboni.
“Sahlala okwensuku kwasekufika uMoffat, Lee kunye loMpilo abavela kulowo mango besithi mina ngihamba ngitshela abantu ukuthi batshontshe ubabhemi,” kuchaza uPhumulani.
“Abathathu laba bangigijimisa baze bangibamba baqala ukungitshaya omunye umakhelwane uthe ebabona wagijima wayatshela abafowethu kwaqala kwafika uKhulekani uthe ebona ukuthi ngihlaselwa ngabantu abathathu wabuyela wayabiza umfowethu uHelikan.
“Ngaleso sikhathi mina ngangivele ngingesenelisi ukuhamba, ubhudi yena bahle bamgamula ikhanda lonyawo.
UKhulekani yena baqala bamtshaya ngesidindi sehloka esiphaqeni basebemgamula umsipha. Ababili laba bathwalwa yimota kodwa ngokuswelakala kwenhlanhla bathi befika esibhedlela bedlula ngoba babelimele okumangalisayo,” kuchasisa uPhumulani ngelizwi lodabukileyo.
Ukhansila wakuWadi 16 uSylvester Sibanda uthe abakoNcube babengasimasela.
“Kundaba eyaphumayo kwavela angathi abakoNcube yibo amasela kodwa akunjalo. Laba bona babelamula baze behlelwe ngamashwa njalo kwakucatshe ubabhemi oyedwa esibayeni,” kutsho uKhansila uSibanda.
Online Reporter