Online Reporter
Nkosilathi Sibanda
UBABONGILE Sikhonjwa uthinte impilo zabantu abanengi kuleli lakwezinye indawo kungakhathalekile ukuba wake wahlangana labo empilweni kumbe hatshi.
USikhonjwa wedlule emhlabeni mhlaka 21 Mpandula ekuseni esibhedlela se-United Bulawayo Hospitals koBulawayo, ngemva kokukhala ngokuvaleka umphefumulo.
Ubeleminyaka engu-49 yokuzalwa.
Kunengi okungakhulunywa ngempilo kasaziwayo lo owaduma kwezokuthokozisa uzulu kuleli, engena kwezomculo, ukulingisa, ukusakaza lokuhlanganisa uzulu ebunandini.
USikhonjwa obesaziwa ngokuthi; The Ndebele Rock Star kukhangelelwe ukuba kuqhutshwe inkonzo yesikhumbuzo ngoLwesihlanu eBulawayo Amphitheatre andubana ayebekwa eGwanda ngoMgqibelo.
Umngane wakhe oseduzane, okade elaye ngesikhathi sokufa, uHaslam Maenzanise uthe babebonke ngempelaviki.
“Ubesemzini wami ngempelaviki, sachitha isikhathi sidlala amakhasi ebusuku. Ngamtshiya ngehola lesithathu ngisiyalala, ngathi ngisiyamkhangela, kazange aphaphame. Ngaphanga ngamgijimisela esibhedlela lapho okwathiwa usefile,” kutsho uMaenzanise.
Emsakazweni uSikhonjwa usebenzele iStar FM leSkyz Metro FM.
Imuli yakoSikhonjwa yethule umbiko ngokulahlekelwa.
“Sibika ngokudabuka okukhulu ngokwedlula emhlabeni kwendodana yethu uBabongile Sikhonjwa. Uthinte impilo zabantu abanengi abakade bemazi.
“Ngalesikhathi, imuli icela ukuthula lokuhlonitshwa ukuze silungiselele umngcwabo wakhe. Siyamukela imikhuleko lokusikhumbula kwenu.”
Inengi labantu koBulawayo lethule induduzo emulini yakoSikhonjwa. Kunkundla zokuxhumana ebulenjini, umuyi uchazwe ngokuthi ubezithandela ukukholisa lokuthokozisa abantu.
Omunye walabo abakade beseduzane loSikhonjwa, ongusomabhizimusi ozimeleyo, uKhumbulani Dube uthe: “Ngimadolonzima. Kuyehlula ukuthi ngikhulume. USikhonjwa ubengumfanami. Besingaqedi iviki singakhulumisananga. Nxa ngidinga okuthile bengiqonda kuye, laye aze kimi. Kalale ngokuthula.”
Umahlekisa uNtando Van Moyo uthe balahlekelwe.
“Kambe sizasala siyini ngokusuka kukaSikhonjwa. Hamba kuhle qhawe lethu.”
Kusenjalo, amankampani lengatsha lapho okwasebenza khona uSikhonjwa aseyethule amazwi enduduzo.
