Online Reporter
Mthabisi Tshuma loRonald Mpofu
ISIGEBENGU esikhulu, ebesihlukumeza abantu ePlumtree, eMatabeleland South, uCabangani “Mike” Mathe ubaleke ejele ngoMgqibelo.
UMathe wagwetshwa iminyaka engu-20, mhlaka 29 Ncwabakazi. Izakhamizi zeBulilima, Mangwe lasenzikini yedolobho lePlumtree zihlalele evalweni ngokuzwa ukuthi isigebengu lesi sesiphandle kwejele.
Isibotshwa lesi kubikwa ngoMgqibelo ebusuku sasebenzisa isaha ukuquma insimbi ezivale ifasitela lejele lePumtree. Waziphumela nje, cala celeni, ezinye izibotshwa zibukele.
UMathe oleminyaka yokuzalwa engu-38, wayengene lokhe engakatholakali lakhathesi. Udume njalo ngokuba ngusomabhizimusi.
Ubegwetshelwe amacala okudlwengula njalo ubesalinde ukuthi amiswe emthethwandaba ngamanye amacala okudlwengula amadoda lokubulala.
Kulandela isiga lesi, abeZimbabwe Prisons and Correctional Services abakafaki umbiko ngalokhu.
Intatheli zithole ukuba uMathe kudala wahlupha izikhamizi, ikakhulu abesifazane kulindawo. Kubikwa ubesenza amacala la ethembe ukuthi ulemali enengi lokuthi ulobudlwano lezikhulu emapholiseni.
Okulusizi yikuthi kulabanye akade ebahlukumeza abesaba ukumangala emapholiseni.
Izakhamizi zithole ukukhululeka mhlaka 20 Ncwabakazi lapho uMantshi uDambudzi Malunga egweba uMathe iminyaka engu-20 ngecala lokuhlukumeza elinye inina elisiyisebenzi sakhe.
