Online Reporter
YiNtatheli kaMthunywa
KULANDELA ukubaleka ejele kwesibotshwa sejele yePlumtree, uCabangani “Mike” Mathe sokuvele ukuthi sokubotshwe ogadijeli ababili okunakanelwa ukuba balesandla ekubalekeni kwakhe.
UMthunywa uyakuveza ukuba kubotshwe ogadijeli ababili ngoLwesibili kuyonale iviki, asebencedisa ekuchwayisiseni ngokubaleka kukaMathe ejele mhlaka 15 Lwezi.
Intatheli izwe udletshana lokuthi omunye wabogadijeli laba ubekhulumisana lonkosikazi kaMathe ngokuthi uzaphuma njani njalo nini ejele, okuyikho okubangele ukuba abotshwe ngoba elesandla ekubalekeni lokhu.
Kukanti omunye obotshiweyo akukaveli isizatho sokubotshwa kwakhe.
UMathe (38) kubikwa wasika insimbi zefasitela lejele, qede wadla phansi.
Ubegwetshwe iminyaka engu-20 ngecala lokudlwengula mhlaka 29 Ncwabakazi njalo kulindelwe ukuba aphenduke emthethwandaba kwelinye icala lokudlwengula.
Kuke kwavela ukuba uyabonakala ezintabeni eziseduzane lelokitshi ledolobheni leli futhi uke watshayela ucingo omunye umamangala emethusela ukuba anganiki ubufakazi emapholiseni.
Izehlakalo lezi ziveze ukuba kungabe kulabantu abamncedisayo kuzenzo zakhe lezi.
Kusenjalo amalunga e-Zimbabwe Prisons and Correctional Services kunye lamapholisa, eZimbabwe Republic Police aphathekile ngokudinga isigilamkhuba lesi nanko inengi lezakhamizi zePlumtree sezihlezi ziphethe izibindi ngezandla kulandela ukubaleka kwakhe ejele.
