Londile Moyo
Ethel Ncube
IDOLOBHO lakoBulawayo liphakathi kosizi olukhulu kulandela ukudlula emhlabeni komlobi wengwalo zesiNdebele, uMihla Sitsha Tsheza.
Umlobi lo, obhubhe ngeSonto ekuseni uzabekwa ngoLwesibili emathuneni eLady Stanley koBulawayo, lapho okubekwa khona abantu abadlale indima encomekayo edolobheni lakoBulawayo.
Abantu babuthene eCowdray Park ku 6430.
USitsha waloba izingwalo ezibalisa, ‘Wangenza mntanami’, uNtokolotshi, Uvuna okuhlanyeleyo, Impilo yakulezinsuku, Esilojeni, Elenxeba ilenxeba, Bamngcwaba ephila uNdwangu lezinye ezitshiyeneyo.
Ezinye ingwalo zakhe bezisetshenziswa ezikolo kunye lakumfundo yaphezulu emaYunivesithi.
UTsheza uqale ukuloba izingwalo ngomnyaka ka-1994 esesesikolo. Umdladla wakhe owaqala ungowokuloba izinkondlo, wavutha wacina esengumlobi wezindatshana ezimfitshane kunye lezingwalo. USitsha udlule emhlabeni eselobe izingwalo ezedlula amatshumi amathathu ezigoqela inganekwane, izinkondlo kunye lezingwalo ebeziveza ubuNtu bethu.
USithandazile Dube owaziwa ngokuthi Um’Africakazi, oyingcitshi kwezokuzithokozisa wethule amazwi endunduzo mayelana ngokwedlula emhlabeni kukaMihla Sitsha ebulenjini.
“Lihambile iqhawe losiba. Mpela isitsha esihle asidleli. Bakwethu sikhala lemuli yakoSitsha ngokulahlekelwa ngumfowethu uMihla Sitsha Tsheza.
“Ubengumlobi wengwalo zesiNdebele, ulobe ingwalo ezinengi ezibalisela ezithi; Wangenza mtanami, Impilo yakulezinsuku, Uvuna okuhlanyeleyo, Untikolotshi lezinye ezinengi njalo nxa ngingaphambanisi ingwalo azilobileyo ziyafika amatshumi amathathu. Ezinye zingama-set books ngaphansi kweZIMSEC. Lala ngokuthula Mihla. Njengama creatives silahlekelwe kakhulu futhi kubuhlungu,” kutsho Um’fricakazi ekhasini lakhe leFacebook.
USitsha uke waba nguMsekeli oqinileyo wemisebenzi yezandla. Usebenze njengoNobhala weSizwe weZimbabwean Academic and Non-Fiction Authors Association wabuye waba nguMgcinisihlalo weSizwe weKhaya Labalobi.
Ngomnyaka ka 2020 kunye lo 2021 wathola izicoco kumaBulawayo Arts Awards ngengwalo zakhe ezithi; Untokolotshi loluthi Ngubani owabulala uDube? Wabuye wathola esinye futhi isicoco ngo-2021 ese-Intercontinental Young Pan-Africanist Award.
Omele i- Zimbabwean Academic and Non-Fiction Authors Association (ZANA) koBulawayo uZibusiso Mabonisa ubike ukuba uMihla uzabekwa ngoLwesibili eLady Stanley.
“Umzimba kaMihla Sitsha uzabekwa emathuneni eLady Stanley Cemetery kusasa. Inkonzo yesikhumbuzo izakwenziwa emzini wakhe, eCowdray Park kusukela ngo-8 ekuseni, besekuyiwa emangcwabeni ngo-11 ekuseni.
“Siyabonga kubo bonke abancedise umdeni ukuthi unike uMihla umngcwabo olesithunzi,” kutsho uMabonisa kusitatimende.
USitsha utshiye amadodana amabili kunye lonkosikazi.
Online Reporter