Online Reporter
UPHUTHUNYISWE esibhedlela isimo sakhe singesihle owesifazane weNhlungwane, KwaNongoma, ngemva kokubulawa ngesihluku kwendodana yakhe obekuyiyona yodwa, uSiyanda Mthokozisi Mvelase (27).
USiyanda obesanda kuya eGoli ngemva kokuthola umsebenzi wokutshayela izimota ezibhadalisa ngebanga olihambile, udutshulwe watshona ngesonto eledluleyo eMaponya Mall, eSoweto.
Kulesi sigameko kusolwa umbango okhona phakathi kwabosomatekisi labashayeli balezi zimota.
Unina kaSiyanda, uNkosazana Khonzi Khuzwayo, kuvela ukuthi akazamukelanga kahle izindaba zokutshona kwendodana yakhe, abesethembe yona ukuthi izomsiza ekhaya, okwenze ukuthi agule aze ahanjiswe esibhedlela.
Umdeni wakhe ukhala ngokuthi ngeke baze bakuthole ukuthula njengoba bezongcwaba umlotha okuyinto ebaphatha kabi njengoba kuthiwa kusele ithambo lomlenze kuphela.
Umalume kamufi uMnumzana uMlamuli Khuzwayo, ekhuluma lophiko lwezindaba lakwaSABC, uthe akazi abuchaze njani ubuhlungu abuzwayo ngokutshona kwendodana kadadewabo.
“Okubuhlungu kakhulu yikuthi sesitsheliwe ukuthi utshe ungumlotha akabonakali lokuthi ungubani, into etsho ukuthi kusele ithambo lomlenze kuphela.
“Bekungenzeka sithobeke amanxeba uma ukube bamtshiya kanjalo ngemva kokuthi bemdubulile umzimba wakhe siyawubona. Asilamali yokungcwaba. Asilalutho,” kutsho uKhuzwayo.
Uthe abakufunayo njengomdeni ubulungiswa ngesimo esibehlele.
Uyisekazi kamufi uNkosazana Ntombenhle Khuzwayo ekhuluma leSolezwe, uthe balindele ukuthi bahlangane lamhlanje njengomdeni ukuqala izinhlelo zomngcwabo. Uveze ukuthi bayakuzonda okwenziwa ngosomatekisi enganeni kadadewabo
“Udadewethu akasela langane, lamzukulu njengoba uSiyanda ebengakabi langane, basenze into ebuhlungu osomatekisi. Udadewethu kumanje uyagula iBP iphezulu, simzamela losizo lokuthi abone udokotela ozameluleka ngoba isimo sakhe asisihle,” kutsho yena.
Uthe izinsalela zomzimba kaSiyanda zisaseGoli.
Uveze ukuthi ezinsukwini ezimbili ngaphambi kokuthi abulawe uSiyanda, wayemtshela ngezinhlelo alazo zokwakhela umama wakhe indlu.
“Ibulawa nje ubelezinsuku ezimbili kuphela eqalile ukusebenza, silimele singumdeni kubuhlungu, lale imota akade esebenza ngayo ubesanda kuyithenga. Indodana kadadewethu omdala lena, bekuyiyona yodwa, ngemva kokuqeda u-matric, weza lana kimi eGoli ezofuna umsebenzi.
“Bengijwayele ukumsiza ezintweni ezehlukeneyo, kodwa abekufuna ukuzimela. Ekuhambeni kwesikhathi waphinde wehla waya ekhaya, ubuya nje uzozama kulo mkhakha kanti kuzokwenzeka lesi sehlakalo,” kuchaza yena.
Uthe wayejabule emfonela emtshela ukuthi uyabuya eGoli njengoba esezoqala umsebenzi wokutshayela izimota ezikhokhelwayo.
“Siyathuthumela ngalesi sehlakalo ingane isanda kuqala nje ukusebenza. Ubefuna ukwenza isimo sibe ngcono kuye lomama wakhe, ongaphilanga nanko uhlala egula. Ubelezinhlelo ezinengi manje konke kuphelile,” kuchaza yena.
Kwashuba isimo kwavala inxanxathela ngemva kwalesi sehlakalo umphakathi uthi awusawafuni amatekisi kule ndawo.
Kodwa ngoLwesihlanu, isimo sibe ngcono ngemva kokuthi uMphathiswa wezokuThutha uNkk Kedibone Diale-Tlabela, ebe lomhlangano lezikhulu ezihlukeneyo, lapho kugcine kunxuswa umphakathi ukuthi ume ukuphazamisa ukusebenza kule indawo.
Okhulumela amapholisa aseGauteng, uColonel Dimakatso Nevhuhulwi, uthe kuphenywa icala lokubulala, lamabili okuzama ukubulala lokulimaza impahla ngemva kwalesi sehlakalo.
Ubulembu
