Online Reporter
Ethel Ncube
KULENINA lesigabeni seMafusire ngaphansi kwenduna uMazuru eGutu elithe liqeda ukubeletha usane laqonda egangeni laluklinya, laselilulahla.
Isehlakalo lesi senzakale ngempelaviki edluleyo.
Kubikwa uAngeline Dzikorehonde wayesemasimini ngesikhathi eqala ukuhelelwa wasuka wabuyela ngekhaya lapho afika wabeletha eyedwa. Uthe eqeda lapho wahamba losane egangeni waluklinya andubana alulahle egangeni.
Kuvele ukuba u-Angeline walahla isidumbu sosane lolu endaweni engaba ngamamitha angu-30 nxa usuka lapho ahlala khona.
Ngesikhathi ebeletha kazange ananzelele ukuba abantwabakhe abaleminyaka engu-5 lomunye oleminyaka engu-9 bezwa kukhala umntwana omncane bagijima bayabikela omunye umfana owagijima wayabikela abesemasimini ukuba umama usebelethile.
Izihlobo zikametheswacala zabuya zisuka emasimini zafika zabuza uAngeline ukuthi umntwana uyengaphi wabachazela ukuba umntwana umbelethile wamkhama wayamlahla. Izihlobo zabikela amapholisa wona abopha uAngeline.
Intatheli ixhumane lesikhulumi samapholisa eMasvingo uInspector Kudakwashe Dhewa obike ukuba indaba enjalo isezandleni zamapholisa.
“Sibophe uAngeline Dzikorehonde obelethe usane waluklinya esanda kubeletha. Sixwayisa uzulu ukuba nxa elenkinga abikele omunye oseduze kwakhe kumbe umuntu amthembayo, nxa kuyikudinga uncedo kaludinge ezihlobeni kusesemasinyane. Ukuthi ubelethe umntwana umkhame asiyondlela yokuqeda uhlupho kodwa yikungezelela udubo ngoba uzahlupheka ususejele abantwana besele khaya bodwa,” kuphetha uInsp Dhewa.
