Online Reporter
Fungai Muderere
I-HIGHLANDERS isibike ukuba isilomdlali omutsha, umntaka mqeqetshi uBenjani Mwaruwawi.
Umdlali lo, uBenjani Mwaruwari Jr, oleminyaka engu-21 yokuzalwa, ungene kuBosso kuliviki, ngesikhathi iqembu liqhubeka lidinga ukuziqinisa kusigaba sesibili seCastle Lager Premier Soccer League.
IBosso yethule uBenjani Jnr ngoMvulo ngevidiyo efakwe emakhasini ayo enkundla zokuxhumana.
UBenjani Jnr wakhulela esikolo sePortsmouth eNgilandi ngaphambi kokungena kuYeovil Town Academy ngo-2020.
NgoMfumfu ka-2022 wasayina isivumelwano sakhe sakuqala leYeovil Town ngemva kwesizini enhle lapho ahlohla khona amabhola angu-25.
Ngesikhathi eseNgilandi, wadlalela njalo amaqembu abalisela iSherborne Town leDorchester Town ebolekiwe, ngaphambi kokuyadlalela iBridgwater United.
Khathesi usezasebenza ngaphansi kukayise, uBenjani Mwaruwari, kuHighlanders, lapho okukhangelelwe ukuthi ancedise iqembu lithuthukise indlela elidlala ngayo esigabeni sesibili sesizini.
