Online Reporter
Nkosilathi Sibanda loFungai Muderere
ABAKUTHAKAZELELI abalandeli beHighlanders ukuthi iqembu labo selichazwa ngokuthi “liyintshantshu” kwezokuqeda imidlalo lingutshiki lobhanqa.
Umqeqetshi walo, uBenjani Mwaruwari usadinga iqhinga lokuthi bangaligaxa njani ibhola entanjeni, ukuze bathabise abalandeli labo asebephethe ngokumsola.
Kumdlalo odluleyo lapho iqembu elidibane leScottland, umdlalo uphele kuyi 1-1, uMwaruwari uphume enkundleni ebika ukuthi usuthisekile, kodwa eqinisweni uyazi ukuthi kukodwa kuphela okumele kwenziwe ngabadlali.
Kukho konke, kumele bahlohle.
Ngemva kokudlala imidlalo eyisithupha bekhutha igedi, abadlali beHighlanders bazangena enkundleni yeBarbourfields ngeSonto belethemba lokuthi bazathola imiklomelo yonke kumdlalo weCastle Lager Premiership leZPC Kariba.
Bengena kulumdlalo, kulethemba lokuthi amaphepha omdlali ovela eZambia, u-Isaac Ngoma azabe eselungisiwe ngoba kukholelwa ukuthi kungaba nguye ozathola amabhola angena egedini.
Iqembu likaMwaruwari leli lilomthwalo omkhulu wokuthi lithole ukunqoba kwalo kokuqala. Ngakolunye uhlangothi, abalandeli balo abathembekileyo kumele ngeSonto bengeze amandla bethemba ukuthi lokhu kungaguquka eMagumeni.
Loba idlala ibhola elihle elikhangayo, iHighlanders yehlulekile ukuguqula amathuba ayo wokuhlohla amabhola, into esichazwa ngabanye ngokuthi “babhala kahle kodwa baphendula okungayisikho”.
Ngemva kokudlala okuhle eRufaro Stadium ngePhasika bebhekene leScottland FC, ithemba lisekhona ukuthi izinto zingaguquka.
UMwaruwari uthe njengoba wake waba ngumdlali, engumgadli, uyazi ubuhlungu bokudlala ungahlohli.
“Ngake ngaba ngumgadli, ngakho ngiyazi ukuthi kubuhlungu kanganani ukudlala uzama ukuhlohlwa kodwa kusehlula,” kutsho uMwaruwari.
“Eduzane nje sizabe sesilitholile iqhinga lokuhlohla. Kusukela ngelanga lakuqala, inhloso yethu yikunqoba.”
Kweminye imidlalo kulimpelaviki, iChicken Inn izahlangana leTelOne enkundleni ye-Ascot, eGweru. Intshantshu zanyakenye iScottland, ziseBarbourfields leBulawayo Chiefs.
Ekhokhela ilogu, ekhanya iqinile lonyaka, iCAPS United izabhekana leFC Hunters eRufaro Stadium. Abafana beDeMbare bayamukela iFC Platinum emdlalweni, okungomunye umdlalo olakho ukuhlabusa.
Kukhona njalo umdlalo weNgezi Platinum Stars leTriangle United enkundleni yeBaobab, kuthi amaqembu amatsha iHardrock le-Agama ahlangana eChahwanda Stadium.
Kusenjalo, isibalo samabhola asehlohliwe khathesi sifika i-87 kulisizini.
Umdlali weScottland, uKhama Billiat uphakathi kwabagadli abahamba phambili, elingana loJairos Kasondo, Ralph Kawondera loMarvelous Mukumba, bonke asebehlohle amane.
Imidlalo yeCastle Lager ngeviki
lesikhombisa:
Mgqibelo: FC Hunters v CAPS United (Rufaro), MWOS v Simba Bhora (Ngoni), Hardrock v Agama (Chahwanda), Ngezi Platinum v Triangle (Baobab), TelOne v Chicken Inn (Ascot), Bulawayo Chiefs v Scottland (Barbourfields)
NgeSonto: Highlanders v ZPC Kariba (Barbourfields), Dynamos v FC Platinum (Rufaro), Manica Diamonds v Herentals (GreenFuel Arena)
