admin
Thokozile Mbedzi
KULENDODA yesigabeni seGulalembila ngaphansi kwenduna uNekatambe eDete eyethuse abantu kulandela ukubhaxabula umntwana oleminyaka emithathu waze wafa ngoba ethambise engutsheni.
Umetheswacala uNkathazo Penga oleminyaka engu-38 kubikwa ubhaxabule umntwana kankosikazi wakhe uSonny Diton Tembo oleminyaka emithathu ngoLwesibili kuviki ephelileyo waze wafa.
Kubikwa isidumbu sikaDiton sitholakale silamanxeba umzimba wonke.
Kuzwakale ukuthi unina kamuyi, uEstere Tembo oleminyaka engu-40 watshiya umntwana loPenga esiya emasimini kodwa uthe ephenduka wafica umntwana esedlule emhlabeni.
Kubikwa unina womntwana wabuza umkakhe ukuthi kwenzakaleni laye wathi kazi lutho ubengekho.
Ekhuluma lentatheli kaMthunywa uMnumzana Colbert Muleya uthe yena baphelelwe njengamadoda.
“Kasilamandla silapha njengamadoda futhi kasisela sithunzi emphakathi njalo izimuli sezizakwesaba ukuba labesilisa. UPenga ngumuntu obehlala etshaya umntwana lo kusa kwamalanga nxa engathambisa kungakho lakhathesi akuzange kumangalise ukuthi nguye okwenzileyo lokhu.
“Umuntu nxa engafuni ukuhlala lomntwana angamzaliyo kungcono amuse kwabakibo kulochuku lolu olunje lokubulala umntwana. Isidumbu besigcwele amanxeba okutshaywa umzimba wonke,” kulandisa uMnu Muleya.
Kubikwa uPenga watholakala ephethe ihloka ngesikhathi ebotshwa ngamapholisa.
Isikhulumi samapholisa elizweni uAssistant Commissioner Paul Nyathi uvumile ukuthi umbiko lo bawamukele.
“Sichwayisisa icala lomntwana owatshiywa ngunina esiya emasimini esagabeni senduna uNekatambe wathola umntwana oleminyaka emithathu esefile,” kuphetha uAsst Comm Nyathi.
Online Reporter