admin
YiNtatheli kaMthunywa
KUDABA olutshiye abantu betshwaqe umzimba kulelinye ilunga lebandla leJohane Masowe eRedcliff eKwekwe okubikwa libulele abantu abayisithupha lalimaza abahlanu izolo ekuseni.
Kubikwa uThubelihle Khoshow oleminyaka engu-26 yokuzalwa weStone Clare, eRedcliff eKwekwe olilunga leJohane Masowe waba lokungahlaliseki engqondweni esendlini okwenza uyisekazi wamusa enhlane.
Kuzwakale ukuthi bathi belokhu besenhlane uKhoshow waqala ukusuphuna izihlahla efuqa lezimota ezimileyo andubana abuyele lapho ahlala khona.
Isikhulumi samapholisa elizweni kusitatimende samapholisa esikubulembu beTwitter sivumile ukuthi indaba le yenzakele njalo sagcizelela ukuthi amapholisa achwayisisa ngodaba lolu.
Uthe amapholisa asebophe uThubelihle Khoshow oleminyaka engu-26 esetheswa amacala la.
“UKhoshow efika endlini wathola umkakhe engekho, wadobha umkhonto, ingqamu kunye lehloka waya komalumakhe lapho afika wabulala isivalo segilazi ngesikhali esingaziwayo andubana angene endlini.
“Uyise omncane lamanye amalunga emuli benelisa ukuphuma babaleka ngefasitela lendlini yokulala batshiya abantwana abane belele labanye ababili.”
Isikhulumi samapholisa, uAsst Comm Nyathi uthe abadala bathi bephenduka bafica abantwana sebeqalekile belamanxeba okugwazwa.
“Bathi bebona lokhu babaleka baya komunye umakhelwane olipholisa, umetheswacala wabalandela lapho afika wagwaza ipholisa lelo emhlane ngomkhonto. Waphinda walimaza abanye abathathu kakubi lendoda eleminyaka engu-33.
“Umetheswacala wabuyela endlini yakhe wafika wagwaza wabulala abesifazane ababili oleminyaka engu-56 le 85 andubana adlwengule unkosikazi kamalumakhe,” kutsho isikhulumi samapholisa.
Kubikwa abantwana ababelinyaziwe bahanjiswa esibhedlela lapho abathathu oleminyaka eyisikhombisa, oleminyaka emithathu lolenyanga eziyisikhombisa abafika bedlula emhlabeni.
Isikhulumi siphethe ngokuxwayisa uzulu ukuthi kumele aphathe ngonanzelelo abantu abalodlame.
“Amapholisa aseZimbabwe athanda ukukhuthaza umphakathi ukuthi aphathe ngokukhalipha abantu abalodlame emphakathini wabo njalo baphangise babikele amapholisa ngabantu abaziphatha ngale indlela enkambeni zamapholisa eziseduzane labo,” kuphetha uAsst Comm Nyathi.
Online Reporter