Online Reporter
YiNtatheli kaMthunywa
IZAKHAMIZI zesigabeni seNyathi, esabelweni seMatabeleland North, zilokhu zitshwaqe umzimba kulandela ukuba indoda eleminyaka engu-21 yokuzalwa iphendukele unina yambhaxabula ngogodo waze wafa.
Isehlakalo lesi senzakale mhlaka 3 Lwezi, lapho uNhlalo Mpunzi ongaphilanga kuhle engqondweni, ohlala eMasimini Village 1, eKenilworth, ahlasele khona unina ngogodo waze wambulala.
Isikhulumi samapholisa elizweni uCommissioner Paul Nyathi uqinisekise ngokubotshwa kukaMpunzi osolwa ngecala lokubulala unina, uGugulethu Ndlovu, oleminyaka engu-40.
“Amapholisa eNyathi abophe uNhlalo Mpunzi oleminyaka engu-21 owetheswa icala lokubulala elenzakala mhlaka 3 Lwezi eMasimini Village 1, eKenilworth,” kutsho uCommissioner Nyathi.
Kuvele ukuthi uMpunzi wavuka umhlonga ngemva kokuxabana lonina.
“Umetheswacala wabhaxabula unina uGugulethu Ndlovu (40), ngogodo umzimba wonke waze wafa ngemva kokuba bebe lengxabano,” kutsho uComm Nyathi.
Abafakazi baveze ukuthi omakhelwane bezwa umkhosi kodwa bathe besiyafika emzini lo, uNdlovu wayevele esedlule emhlabeni. Kubikwa uGugulethu wawela duzane lomnyango, njalo wayelamanxeba atshonayo aveza ukuba utshayiwe.
Izakhamizi ziveze ukuthi uMpunzi uyaziwa ukuba uyagula umkhuhlane wengqondo futhi kungenzeka ukuba ubengasanathi amaphilisi akhe.
“Besinganakaneli ukuba angenza isenzo esinje. Unina ubemthanda. Ubezama zonke izikhathi ukuba amncedise,” kutsho omunye umakhelwane.
Isehlakalo lesi sesibuye senza inkulumo ngokutholakala kosizo lwezempilakahle kulabo ababhekane lomkhuhlane wengqondo emaphandleni zavuselelwa.
“Lokhu kusikhumbuza ukuthi impilakahle yengqondo ibalulekile futhi ingaba yingozi nxa inganakekelwanga. Izimuli zidinga usizo kodwa ziluthola ngaphi? Sisodwa,” kutsho esinye isakhamuzi esizichaze ngokuthi nguThembo, nje kuphela.
Amapholisa asekhuthaze uzulu ukuba ananzelele nxa elezihlobo ezilomkihuhlane wengqondo, njalo abone ukuba ziyathola usizo lwezempilakahle esibhedlela ukuze kuvikelwe izingozi ezifana lalezi.
UMpunzi usezandleni zamapholisa njalo uyawancedisa ekuchwayisiseni kwawo.
