admin
Thokozile Mbezi
KULENDODA yeMkoba 5 eGweru ebhaxabulwe ngoyisezala bayitshiya isesimeni esibi ngemva kokuba lengxabano lonkosikazi wayo.
ULovemore Ndava oleminyaka engu-30 yokuzalwa ube lokungazwisisani lonkosikazi wakhe uPrecious Munyai oleminyaka engu-27 yokuzalwa mhlaka 24 Mfumfu ngemva kokumfica engekho endlini evela emsebenzini.
Kubikwa ababili laba bahle baqala ukuxabana emzini wabo okwabangela ukuthi uMunyai aze atshayele abafowabo ucingo ebabikela ngohlupho lolu.
Abafowabo bakaMunyai uGodknows loRopafadzo babuya bengasadlanga nkotshana bafika bamtshaya ngezibhakela baphinda bamgwaza ngengqamu emhlane lasekhanda.
Ekhuluma lentatheli kaMthunywa uBenard Moyo uthe kube lomsindo omkhulu kubangelwa yikuthi uNdava wafica unkosikazi wakhe engekho endlini.
“Kulwiwe kwaba luthuli ngenxa yokuthi uNdava wazondela ukuthi kungani wathola unkosikazi wakhe engekho endlini evela emsebenzini.
“Umkakhe wathi enanzelela ukuba umkakhe usethukuthele wafonela umfowabo owabuya lomunye bafika bamtshaya bamgwaza emhlane lekhanda walimala.
“Omakhelwane yibo abasiza uNdava ngokumlamulela ngoba babezacina bembulala,” kustho uMnu Moyo.
Isikhulumi samapholisa esabelweni seMidlands ulnspector Emmanuel Mahoko ebuzwa ngodaba lolu uthe solufikile ehofisini yabo.
“Sichwayisisa udaba lwendoda exabane lonkosikazi kwacina sokungenela oyisezala. Sithanda ukuxwayisa abasemitshadweni ukuthi kabadinge usizo kubaphathi bezigaba nxa kulokungazwisisani ukuze baxazulule kuhle inkinga ababhekane lazo,” kuphetha ulnsp Mahoko.
Online Reporter