admin
Ethel Ncube
UTSHONELWE lilanga omunye ubaba weshurugwi olisela elikhulu ngemva kokuba ebotshwe ngoba esetheswa umlandu wokweba impahla ebiza imali engaba ngange US$5 million ngeviki pehlileyo.
uPanganai Sithole oleminyaka yokuzalwa engu-43 ubotshwe ngamapholisa kulandela ukutshontshela abantu ehlomile.
Abamangalela umsolwa uLevison Chakawa loJoshua Chakawa abahlala eGweru kubikwa bathwala umsolwa uPanganai Sithole bevela eMsvingo besiya eShurugwi. Bathe besendleleni umsolwa wakhupha umbhobho wathi ufuna imali. Khonokho nje umtshayeli wamisa imota omamangala baphuma begijima betshiya imota lomsolwa.
Umsolwa wasala ethatha imota wayitshayela waze wayafika eShurugwi.
Amapholisa athola udletshana ngomsolwa amdinga bathi bemthola bamfica elamakhompuyutha,omakhalekhukwini, inombolo zemota (number plates) kanye lemota ayeyitshontshile lamakhiye akhona. Konke ayekutshontshile kwakubiza imali engange US$517 790. Okwamanje umsolwa usezandleni zamapholisa.
Isikhulumi samapholisa eMidlands uInspector Emanuel Mahoko uxwayise uzulu ukuthi nxa ehamba ngemota ananzelele abantu abathwalayo.
“Siyaxwayisa uzulu ukuba nxa ehamba ngemota kangathwali umuntu angamaziyo ngoba angabalakho ukuthwala izigelekeqe ezihlomileyo.
Ngithanda ukubonga umphakathi ngokusebenzisana kuhle lamapholisa lapho kudingwa izephulamthetho,” kuphetha uInsp Mahoko.
Online Reporter