Online Reporter
BAKHONA abangani lezihlobo asebekujayele ukuthi banganxuswa kungabe kusemtshadweni kumbe emdlalweni wokuthokozela ilanga lokuzalwa komunye kuzakuthi ngemva komdlalo ahlale okwesikhathi eside uthole labanikazi bomdlalo sebeze bedidekile ukuthi bangamtshela njani ukuthi avalelise.
Umuntu wakhona kunzima ukuthi athwale imitshaqana yakhe aphindele emuva, abanye baze bathume abantwana ukuthi babuze lowomuntu wemzini ukuthi kanti lapho avela khona amabhasi akhona angabe efile yini.
Kwesinye isikhathi lezindlu zokulala ziyabe zingeneli kuhle ufica abantu sebelala nzima ngenxa yomuntu, mhlawumbe uthole lengubo zisilela bacine bekunika okungobhayana kwabantwana okunuka ubhuqu bezama ukuthi ukhumbule emuva.
Ngikhumbula ngake ngaya kwenye indawo ngithunywe ukuba ngibe ngusodombo, bangihlangabeza ngangeniswa exhibeni lami lokudla babekuletha khonapho njengoba ngangihlonitshwa njengomkhwenyana. Ngithe lokhe ngisadla ngezwa okungokhekhe okwakudlala phandle sekudlephana kusithi umuntu wemzini angatshiya isitshwala ngesami ngahle ngayifunda ivaliwe ukuthi lapha ekhaya kulendlala akusamelanga ngihlale sekumele zivuke zibotshwa.
Ngiyangibone lezinye izihlobo labangani, kwakuthi nxa kungafiwa ngemva komngcwabo bazahlala ufice abantu sebeze bekhulumela imfihlo zabo ezibayeni zembuzi ngoba bengafuni ukuthi uzwe izinto abazikhulumayo
Kwesinye isikhathi nxa kuyabe kusemadolobheni bayaluka amaqhinga wokuthi uhambe uzwe bethi lezinsuku sokulomuntu olitshapha ekhaya.
Ayixabene.
