admin
Nkosilathi Sibanda
INGATSHA zonke zomdlalo we-basketball ziyavuma ukuthi ngempela ubukhokheli obuzwayo bukoBulawayo.
Zilubhekise esikolo seMtshabezi ngoMgqibelo odluleyo inkokheli zalumdlalo ebezivela kuzabelo zonke zelizwe kulandwe ukuyavota.
UJoe Mujuru, owakoBulawayo ubuyiselwe esikhundleni sokuba ngumkhokheli wenhlanganiso yeBasketball Union of Zimbabwe (Buz) kulolukhetho.
Izikhulumi ezixoxe lentatheli yephephandaba likazulu zibike ukuba uMujuru bekufanele ukuthi aqhubeke ekhokhela ngoba usungule inhlelo ezithuthukise lumdlalo kuminyaka emithathu edluleyo.
“Benze kahle abavotileyo ngokukhetha uMujuru. Le yindoda elobukhokheli obuqotho. Isezandleni ezinhle iBasketball Union of Zimbabwe,” kutsho Nkosiyabo Tshuma ongumqeqetshi we-basketball koBulawayo.
ULazarus Muhomwe osafundela ukuqeqetsha umdlalo lo ezikolo uthe ukusungulwa kwemincintiswano ezikolo kwavula inengi lababalisi amehlo ngesikhathi iqula likhokhelwa nguMujuru likhankasela umdlalo ngesizini ka 2018.
“Kube ngumbiko ojabulise thina sisizwa ukuthi uJoe [Mujuru] ulokhe engumongameli. Nguye owasitshengisa ukuthi umdlalo we-basketball lawo ufana leminye. Siyethemba uzaqhubekela phambili esenza okuhle.”
Omunye wabakhokheli balumdlalo esabelweni seMatabeleland North uPendrick Ndlovu utshele uMthunywa ukuba uMujuru ulomlandu wokuthi aqhubeke ngenhlelo ze-Buz zonke, aphinde abambanise amalunga alumdlalo.
“Engingakutsho ngokukhetha kukaMujuru, esimbiza ngokuthi nguBro Joe, yikuthi ungumkhokheli wabantu. Sithi amahlophe njalo uzimisele emsebenzini.”
Ekhuluma ngoLwesibili, uMujuru uthe ubonga wonke amalunga amkhethayo. “Insika yikubambana ukwenzela ukuthi umdlalo wethu we-basketball uyephambili. Ngibonga bonke abatshengise ukungethemba,” kutsho umkhokheli lo.
Kukhetho lolu uMujuru unqobe uAllen Mavhunga loDavid Pick. UPick ucine esekhethwe ukuba ngumsekeli kamongameli. Isihlalo sikamabhalane siphiwe uCharmaine Chamboko, kwadliwa uSikhumbuzo Ndlovu.
Abanye abangene kukomithi yabakhokheli nguTonderai Shasha, Gideon Chikopa, Taurai Chitsinde loJacqueline Chironga.
Online Reporter