Online Reporter
Ethel Ncube
ZIMADOLOZIMA izakhamizi zeGuruve, eMashonaland Central kulandela ukubulawa kwabantu abahlanu abemuli yinye ngeSonto ebusuku.
Umetheswacala uAnymore Zvitsa usolwa ngokubulala abantwabakhe ababili, abazukulu kunye lowesifazana oyedwa qede wabaleka wayacatsha entabeni.
Omakhelwane kubikwa bavuswa ngumsindo owawuvelela lapho okwabulawa khona abantu bavuka bayakhangela bengomakhelwane bebabili bathi befika emnyango bathola kugcwele igazi, uTendai Zvitsa ethe daca evele engasaphefumuli elamaxeba atshonayo esifubeni.
Baqhubeka bakhangela bathola umzimba kaGrace Zvitsa (66), Loice Chiringaushe (37), Takudzwa Kariva (5) loTendai Chirenje (2) ekamelweni lokulala. Baphinda njalo baqhubeka bedinga bathola abazukulu bakaGrace Zvitsa ababelele kwelinye ikamelo bengu-5 bona baphepha.
Omunye welunga lemuli le, uTendai Zvitsa wagijinyiselwa esibhedlela kodwa wathi efika wedlula emhlabeni.
Isikhulumi samapholisa elizweni uCommissioner Paul Nyathi ubike ukuba indaba le baphezu kwayo.
“Amapholisa asebenzisa ubuchwepheshe bonke ukudinga umetheswacala besebenzisa imitshina yokudingisisa yaphezulu ama-drone, kulokusebenzisana njalo kwengcitshi zamapholisa eSupport Unit kunye labe Crimininal Investigations Department, Canine Unit leHorse Patro.
“Ingcitshi lezi zidinga ezintabeni lapho okusolelwa ukuba umetheswacala angabe ecatshe khona,” kubika uComm Nyathi.
