Online Reporter
Ethel Ncube
KULENDODA yeMakey Compound, eMkwasine eChiredzi ebulele umkayo kubangwa indaba zomjolo qede yafulathela isidumbu yayakhelela uMagwebu ebhawa.
Isehlakalo lesi senzakale kuviki ephelileyo lapho umetheswacala uKainos Masekesa oleminyaka engu-32 yokuzalwa abhaxabula khona umkakhe uSithembile Masaiti bebanga ukungathembeki emtshadweni waze wedlula emhlabeni.
Kubikwa ukuba uMasekesa watshaya umkakhe ngezibhakela, ngogodo kanye lomphini wekhuba bebanga indaba zomjolo.
Uthe esemtshayile waqaleka wamtshiya elele phansi waqonda ebhawa wayazinathela utshwala. Uthe ephenduka ngo-3 ekuseni wathola umkakhe esedlule emhlabeni kudala.
Uthe esebona ukuba usefile wathatha amakhiye wakhiyela isidumbu endlini qede wadliwa ngumswenya.
Omakhelwane bathe bevuka ekuseni babona bengamboni uSithembile bacabanga ukuba bake bezwa umsindo kungani kuyaliwa bahle bayamangala emapholiseni bafika babika ukuba kulomuntu abangamboniyo kodwa bacabangela ukuba ukhona endlini.
Amapholisa kazange athathe isikhathi afika endlini, bathola umnyango ukhiyiwe bavula bathola isidumbu sikaSithembile kodwa umkakhe engekho.
Isikhulumi samapholisa eMasvingo uInspector Kudakwashe Dhewa ubike ukuba indaba enjalo isezandleni zamapholisa.
“Amapholisa asaphenyisisa ngodaba lokufa kukaSithembile Masaiti okusolelwa ukuba umkakhe engabe elesandla ekubulaweni kwakhe.
“Sixwayisa uzulu ukuba ubudlwangudlwangu abulungisi uhlupho kukanti kulicala ukubulala. Abantu abahloniphe impilo, akulamuntu okumele abulawe, loba ephambanise okunganani akumelanga abulawe. Ukubulala licala elikhulu kakhulu.
“Nxa kuvele uhlupho dingani umuntu elimthembayo axazulule uhlupho lwenu lingalwi ngoba licina lilimazana,” kubika uInsp Dhewa.
