Online Reporter
Ethel Ncube
ZIMADOLONZIMA izakhamizi zelokitshini leLuveve koBulawayo ngemva kokuba enye indoda ibulele unkosikazi wayo qede yathi ulinyazwe yizigelekeqe.
Isehlakalo lesi senzakale ngempelaviki.
Kucatshangelwa ukuthi uBlessed Mpofu oleminyaka engu-29 weNsukamini, eMganwini angabe wabulala umkakhe uShylet Siyabonga oleminyaka engu-21 yokuzalwa.
Umetheswacala kubikwa waphuma endlini emadabukakusa waya enkambeni yamapholisa wathi umkakhe utshaywe yizigebenga eMganwini wafika endlini elimele kodwa ngokusweleka kwenhlanhla usedlule emhlabeni.
Amapholisa efika endlini athola umuyi eguqile elele ekhoneni yombheda ngesifuba njalo elamanxeba ekhanda.
Umetheswacala wabikela amapholisa ukuthi umkakhe ufike engenelisi ukukhuluma ethi utshaywe ngabantu.
Ekuchwayisiseni kwamapholisa, ananzelela ukuthi kwakulegazi emdulini, futhi ingubo eyayiphezulu kombheda yayilegazi, ihara elegazi ifihliwe ngaphansi kombheda kanye lesigodo se-broom siqamukile silegazi. Lempahla zikametheswacala lazo zazigcwele igazi. Okwadala ukuba abotshwe.
Intatheli ixhumane lobambele isikhulumi samapholisa koBulawayo uAssistant Inspector Nomalanga Msebele obike ukuba udaba olunjalo lusezandleni zamapholisa.
“Sichwayisisa udaba lwendoda yeLuveve okunakanelwa ingaba lesandla ekufeni komkayo. Amapholisa afika lapho okwakuthiwa kutshayelwe khona umkakhe yizigebenga bathola ukuba akutshengisi ukuba kuke kwaba lomuntu obanjwe yizigebenga watshaywa, okuyikho okwenza amapholisa aqhubeka ngokuchwayisisa athola impahla okucatshangelwa ukuba ingabe yasetshenziswa kucala leli,” kubika uAsst Insp Msebele.
