Online Reporter
Zimpapers Sports Hub
KULEMPI enzima kuligi yeZifa Division One, emhlubulweni ongezansi kwelizwe, kulandela ukumiswa kweZimbabwe Saints, ngenxa yokuthi yehluleka ukubhadala indleko zokuba yingxenye yeligi le.
Kuvele ukuthi isizatho salokhu yikuthi “kulenzondano” lo “kweyisana” phakathi kwenkokheli zomdlalo koBulawayo.
AbeZimbabwe Saints sebefake isikhalazo kunhlanganiso yeZifa, bekhonona ngokuvalelwa phandle, emhlanganweni weligi oqhutshwe ngempelaviki edluleyo.
Elinye iqembu elikhitshwe emdlalweni yiGolden Lions. Kubikwa amaqembu la ehluleke ukubhadala ngesikhathi i-US$2 500, evumela ukuthi zidlale ku-Division One kulisizini. Ngokunjalo, iligi izakuba lamaqembu alitshumi lambili.
“Amaqembu la ehluleke ukubhadala imali le ngesikhathi. Ukuphuza lokhu kwenza kube nzima ukuthi siqhube inhlelo zokubhalisa abadlali silandela iFifa Connect System. Njengoba ifasitela lokubhaliswa kwabadlali selivaliwe, ngeke adlale amaqembu la,” kutsho isikhulumi seZifa Southern Region, uBlessing Mbwanda.
Kodwa, abeZimbabwe Saints baqina ngokuthi bakhitshwe kuligi ngenxa yokungezwani lezinye inkokheli.
LeGolden Lions layo ithi kulempi ezikhona.
“Sihlukunyeziwe ngokukhitshwa kuligi ngoba umgcinisihlalo kakuthandanga ukuthi esikhundleni sakhe, okwakhe kwaphela mhlaka 31 Mpalakazi, 2024. Owayengumsekeli wakhe wafakwa esikhundleni sokuba ngumgcinisihlalo weqembu,” kutsho umbiko omunyethwe kusikhalazo seZimbabwe Saints.
Omunye wenkokheli zeZimbabwe Saints, uTawanda Ruzive ukhalaze ngokuthi ukuxotshwa kweqembu labo kuzadala ukuthi inengi lilahlekelwe yimisebenzi.
“Kuyadanisa. IZimbabwe Saints liqembu elikhulu koBulawayo. Isizatho sokumiswa lokuxotshwa kwayo sizakuba lomthelela omubi empilweni zabantu abanengi njalo kuzabuyisela muva ukuthuthukiswa komdlalo kuleli.”
Umqondisi weGolden Lions uKhima Sibanda uthe: “Uxotshwa njani kuligi ongakayidlaleli. Siphila edolobheni lapho umsekeli kamgcinisihlalo weligi angafuni ukuthi kube lomncintiswano.”
Kusenjalo, ilunga lebhodi yeligi, uKhumbulani Mbano, uthe iHerentals College ithembise iUS$10 000 ezasetshenziswa kumivuzo ezaphiwa abadlali abahlohla amabhola amanengi inyanga ngenyanga. Kubikwa njalo ukuthi kulenkampani ezafaka iUS$200 000 yokusekela iligi.
