Online Reporter
YiNtatheli kaMthunywa
AMAPHOLISA eZimbabwe Republic Police (ZRP) abophe indoda evela ngaphansi kukasobhuku uKodobo ngaphansi kwenduna uNhema, eShurugwi isetheswa icala lokubulala umkhwenyana wayo imsola ngokwala lomakhalekhukhwini kadadewabo.
Isikhulumi samapholisa eMidlands uInspector Emmanuel Mahoko uqinisekise ngendaba le.
Isehlakalo lesi senzakale kuviki ephelileyo.
“Mhlaka 5 Mpandula 2025, umetheswacala uLast Bazangi, ongubabazala kamufi ovela ngaphansi kukasobhuku uMadyangove eChibi, wavakatshela udadewabo uPatience Joka (37), obehlala lomkakhe uPeter Chigamanye (55), ngaphansi kukasobhuku uKodobo ngaphansi kwenduna uNhema, eShurugwi.
Kubikwa mhlaka 8 Mpandula ngo 2000 hours, udadewabo wasukuma wayalala watshiya ababili laba emkulwini bexoxa,” kutsho uInsp Mahoko.
Kubikwa ngemva kwesikhatshana, uBazangi wahamba kudadewabo wamazisa ukuthi umkakhe usethethe umakhalekhukhwini wakhe ngamandla njalo wayengasafuni kumbisela.
“Ngaleso sikhathi, uBangazi wagijima waya ekamelweni lokulala lababili laba ephethe ikhuba. Wahlahlela ngalo uChigamanye ekhanda kanengi nengi okwabangela ukuthi awele phansi.
Umkhwenyana lo wagijinyiselwa esibhedlela seShurugwi District hospital lapho afika wafela khona ngemva kokuphiwa umbheda. UBazangi wahle wabaleka endaweni le,” kutsho isikhulumi samapholisa.
Mhlaka 9 Mpandula abacuphi beCriminal Investigations Department (CID) bachwayisisa ngodaba lolu babopha uBazangi ngemva kokumisa lapho okuhlangana khona umgwaqo weZvishavane-Masvingo.
Umetheswacala ukhangelelwe ukumiswa emthethwandaba. Sikhuthaza uzulu ukuthi nxa kulokungazwanani bazame ngazo zonke indlela ukukhumisana umlotha ngokukhulumisana njalo baqakathekise impilo yomuntu ngoba banengi abafayo ngenxa yodlakela olufana lalolu.
Umetheswacala usolwa ngecala lokubulala.
Okwakhathesi uvalelwe ejele njalo ikhuba alisebenzisa ukudala icala leli litholakale emzini wakhe lifihliwe njalo lizakhitshwa njengobufakazi emthethwandaba.
