Online Reporter
Ethel Ncube
ZIMADOLONZIMA izakhamizi zeTsholotsho ngemva kokuba enye imuli yakoDube ebicatshelwe ngelinye ilunga lemuli okwesikhathi esedlula inyanga ezimbili icine ithola ilunga leli lingcwatshwe esivandeni kubangwa ilifa lemali.
UJennifer Dube owacina ukubonakala ngoNkwenkwezi utholakale efile engcwatshwe esivandeni ngoLwesibili.
Ngesikhathi engakafi kwakuzwakale ukuba uthole imali yomkakhe owedlulayo emhlabeni okwakhokhela ukuba aze abulawe ngumntanakhe ngoba efuna imali leyo.
Obikele iphephandaba likazulu njalo engowemuli uMnumzana Phindas Moyo ubike ukuba balenyanga ezimbili bedinga udadewabo.
“Besesilesikhathi eside sidinga uMaDube singamtholi lasemapholiseni sasibikile ukuba sicatshelwe yisihlobo sethu kodwa kwakungelalutho oluphutshayo.
Samdinga yonke indawo asizange samthola kodwa into eyeyisihlupha yikuthi imali yomkakhe yathi isanda kuphuma laye wahle wacatsha, kazange aphinde abonakale. Size samthola kuyonale iviki esengamathambo. “Kambe yisihluku bani, umuntu aze ambulale amngcwabe esivandeni thina silokhe sidinga”, kutsho uMnu Moyo.
“Lapho esasihamba khona sidinga usizo sasihamba sisithi: ‘“Dadewethu nxa lapho okhona wafa vuka uzilwele sikubone, nangu lamuhla sevelile, kumgceke ukuba wabulawa,” utsho njalo.
Ekhuluma lentatheli omunye olilunga lemuli ubike ukuba kudala bedinga isihlobo sabo kodwa bengasitholi njalo bebevele besolela ukuba wabulawa.
“Udadewethu wacina ukubonakala ngoNkwenkwezi. Nxa sibuza umntwana ohlala laye wayethi yena kazi lutho kukanti lonkazana owayesebenza khonapho laye samlandela wayavalelwa ngamapholisa wathi yena kazi lutho umcine egada ibhasi ukuthi wayesiyangaphi kakwazi. “Sabhoda saze sadinwa. Okokuthi engabe efile sasicabangela ngoba umkakhe wathi ngemva kokufa kwakhe kwaphuma imali enengi abantwana bomkakhe bathi akuvumi ukuthi adle imali kayise. Kwaya ngesikhathi silokhu sidinga kungezwakali lutho. Omunye wasincweba indlebe ukuba uJennifer wabulawa wangcwatshwa engadini lathi sayabika emapholiseni.”
“Kwaphakama abeLupane leTsholotsho abomthetho lezakhamizi baya emzini kaJennifer owawusulinxiwa bafika baqonda engadini bathola nangu udadewethu sowabola egoqelwe ngengubo lentambo kagetsi ikhanda ligqokiswe amalembu amabili,” kubika ilunga lemuli.
udaba luyaqhubeka ebulenjini
Ubuye waveza ukuba umntanomkakhe kamuyi laye ulesandla kucala leli.
“Untombazana owayehlala lomuyi wacela uFelicity Moyo ukuba abulale uJennifer yena wala wasemtshela ukuba usezacela ijaha lakhe ukuba libulale unina ukuze athole imali.
“Umuyi wabulawa ngabantu ababili, umntwana womkakhe lesithandwa sakhe loba nje bengakakhuphi iqiniso lonke,” kutsho owemuli.
Intatheli ixhumane lesikhulumi samapholisa eMatabeleland North uInspector Glory Banda obike ukuba indaba enjalo isezandleni zabo.
“Amapholisa ngoLwesibili athola udletshana lokuba uJeniffer wabulawa bahle basukumela phezulu baqonda enxiweni lakhe baqonda esivandeni lapho amapholisa afika agebha athola isidumbu sakhe sigoqelwe ngengubo sabotshwa ngentambo egqokiswe amalembu amabili ebusweni, umzimba wakhe ubusonakele.
Sicela kuzulu ukuba siqhubeke sisebenzisana ndawonye ukuze izigilamkhuba zonke ezigangayo zifinyelelwe yingalo yomthetho,” kuphetha uInsp Banda.
