Online Reporter
Ethel Ncube
KUDABA oluhlasimulisa umzimba kulendoda yeGokwe ebulele uyisekazi wayo andubana ibulale imbuzi iyitshise ndawonye lesidumbu.
Isiga lesi senzakale kuviki ephelileyo esiqintini seRuraka ngaphansi kwenduna uNemangwe eGokwe South.
Umetheswacala uTafara Machiri, okungasatholakalanga iminyaka yakhe, ongaphilanga kuhle engqondweni ubulele uyisekazi, uSylvia Sawa oleminyaka engu-64 yokuzalwa qede watshisa isidumbu.
Sengathi akwenelanga, umetheswacala kubikwa wabuye wabophela abantwana ababili esihlahleni watshaya utshani.
Kucatshangelwa ukuba umetheswacala wahlasela uyisekazi ngebhemba kunye lenduku ezimbili ezatholakala duzane lalapho okwatshiselwa khona isidumbu.
Isikhulumi samapholisa elizweni u-Commissioner Paul Nyathi uthe kucatshangelwa ukuba uMachiri esebulele uyisekazi wathatha isidumbu wasiphosela emlilweni andubana aqonde esibayeni abulale imbuzi layo wayiphosela emlilweni.
Ngemva kwalokho wadonsa abantwana ababili, omunye oleminyaka emithathu omunye uleminyaka emine, wababophela esihlahleni.
Abantwana bahlaba umkhosi bedinga uncedo, basizwa ngumuntu owayesedlula owafika wabakhulula wahamba labo esiyadinga uSylvia wangamboni, wasehlangana lometheswacala engabambeki efuna ukutshaya abantu.
Isakhamuzi lesi sabiza omakhelwane baqhubeka bedinga uSlyvia bangamboni, bayathola izitho zakhe emlilweni, yikho bahle bayabikela amapholisa abuya abopha uTafara Machiri.
UComm Nyathi ukhuthaze uzulu ukuthi nxa behlala labantu abaphila lomkhuhlane wengqondo babase esibhedlela bayethola imithi yabo.
“Sikhuthaza imuli ezilabantu abagula umkhuhlane wengqondo ukuthi babakhangele ukuthi bayathola amaphilisi kumbe imithi okumele bayinathe njalo bakhangelwe ukuba bawanatha ngesikhathi esiqondileyo.
“Abantu laba abalomkhuhlane wengqondo nxa sebelodlame kumele bahanjiswe ezibhedlela. Lingananzelela, silamacala abantu ababuleweyo eChiredzi, Madlambuzi, Mashonaland Central bebulawa ngabantu abangaphilanga kahle engqondweni, kungakho abantu laba badinga ukunakekelwa sonke isikhathi singabayekeli benjalo kodwa malanga wonke kumele abahlala labo babone ukuthi banathile amaphilisi ngoba bayingozi emphakathini,” kuphetha uComm Nyathi.
