Online Reporter
Fungai Muderere
UMQEQETSHI weScotland, uNorman Mapeza uyaziwa ngokwakha amaqembu aqinileyo futhi adlala kuhle, kodwa khathesi usephakamise isithunzi sakhe ngemva kokuba ngowokuqala ukunqoba imidlalo eyisithupha ilandelana kuCastle Lager Premier Soccer League ka-2026.
Okumangalisayo yindlela impumelelo le efike ngayo.
UMapeza akacinanga nje ngokukhokhela iqembu lakhe ukuthi linqobe imidlalo eyisithupha ilandelana, kodwa yonke ifike bengahlohlwanga ngitsho ibhola elilodwa, njalo benelisa ukuhlohla amabhola angu-13.
Kuligi engandisanga ukuba lezinguquko kunye lempumela emincane, abafana bakaMapeza sebethole indlela yokunqoba etshiye amanye amaqembu ekhathazekile.
IScotland iqale ukwakha imbali ngomdlalo weviki lesi-14 ngesikhathi benqoba iChicken Inn nge 2-0. Lokho kwalandelwa ngenye impumelelo efanayo nge 2-0 bedlala leCAPS United ekhaya. Ngemva kwalokho bahlangana leHerentals lapho abaphuma khona benqobe nge 2-0.
ITriangle United, isemsileni welogu, yehlulwa nge 3-0. IHardrock layo yehlulwa nge 2-0. Baphinde batshaya iNgezi Platinum Stars nge 2-0 besemdlalweni ngeviki edluleyo.
Okwenza lokhu kube yimpumelelo enkulu kakhulu yikudlala kuhle kwabafana bakhe. Ngesikhathi abagadli beqhubeka bethola amagoli, imvimbi zakhe zazivala ngci emuva.
Kusukela ekuqaleni komsebenzi wakhe wobuqeqetshi, uMapeza ubelokhu ehlonitshwa ngenxa yokusebenza ngokwezinga laphezulu lokuzimisela ukwakha amaqembu aqinileyo.
Njengoba umbango wokudinga intshantshu uqhubeka usiba lukhuni, amanye amaqembu azabe edinga indlela yokudiliza udonga lukaMapeza lokuvikela.
