Online Reporter
Ugwalo: Umendo
Olulotshwe nguBarbara C Makhalisa
IMIBUZO ENGAVELA KUGWALO
Sikhumbuzo Dabengwa
Sesilugoqa ugwalo lwethu bafundi. Siletha kumfundi wezingwalo imibuzo angazibuza yona ukuze aphathiseke ekuhlolisiseni ugwalo alubale waluhluza.
Kusemqoka- ke ukuba umfundi ekuphenduleni ahlolisise imiklomela ayiginqelayo.
Imvama kudingeka umfundi aphendule umbuzo obuziweyo betshaya phezulu kwezimpawu zombuzo.
Akufanelanga impendulo ibe kude lombuzo. Akufanele njalo ukuba umfundi alandise ezama ukuveza ulwazi ngogwalo.
Lokhu kuba lolwazi logwalo kuzamela akuveze ekugxileni kumbuzo hatshi ukulandisa ngesisusa sogwalo sakulufinyeza.
Lokhu kuphendula ukwenza ngokugxila kumbuzo abuye alethe isisekelo esivela kugwalo ukubonisa ukuzwisisa kwakhe ugwalo.
Siyakhuthaza abafundi ukuba bazivivinye ngale imibuzo babuye babumbe eyabo begxile kuzindikimba zogwalo.
IMIBUZO
1. Landisa ngenhlupho uGugu ahlangana lazo ekwendeni kwakhe. Sekela impendulo yakho ngezehlakalo esivela kugwalo.
2. Landisa ngobunzima obehlela isifazana esibukezwe kulolugwalo. Sekela impendulo yakho ngabesifazana abahlangana lobunzima ekuphileni kwabo.
3. Umendo awuthunyelwa gundwane. Landisa uveza ukuqiniseka kwesaga lesi kugwalo luka Makhalisa. Sekela impendulo yakho kabanzi.
4. Impilo iyajikajika njengevili likantshelelezane. Kuqiniseke kanganani lokhu nxa ukhangele izehlakalo zogwalo lolu. Sekela impendulo yakho.
5. Landisa ngezimilo zabalingiswa abalandelayo. Sekela impendulo yakho ngezehlakalo ezivela kugwalo.
UGugu , UNdaba , UThulani , uMaZulu , UJenny.
6. Landisa ngezifundo ozithole kugwalo lolu. Sekela impendulo yakho ngezehlakalo ezivela kugwalo.
7. Umlobi uhloseni ngokuloba ugwalo olulalezi izehlakalo. Loba ulandisa inhloso yakhe njalo usekela impendulo yakho ngezehlakalo ezivela kugwalo.
8. Ukufundisa abantwana kuqakathekile, kungakhathalekile ukuba ngumfana loba yintombazana. Loba usekela umutsho lo ongaphezulu.
9. Uthando lukaThulani alukholakali. Landisa uletha umbono wakho.
10.UGugu yisibonelo somuntu obekezelayo. Landisa uveza ukuqiniseka kwalokhu.
11.Abangane abaqotho siyabadinga ekuphileni. Uvumelana lomutsho lo na? Sekela impendulo yakho.
12. Izolo abesintwana bebengaphansi komthetho wesilisa okusolisayo. Uyavumelana lomutsho lo ngokuvezwe kugwalo. Sekela impendulo yakho.
