Online Reporter
Sikhumbuzo Moyo
UGATSHA lwe-Environmental Management Agency (EMA) lubika ukuba seluqinisa umkhankaso wokulwisana lemlilo yendle elizweni lonke.
Kuvele ukuba lesi yiso isikhathi sokuthi abantu bahlale beqaphele ukumemetheka komlilo emakhaya lasegangeni njalo kumele kulandelwe izixwayiso ezibalulekileyo ekwenqabeleni ingozi.
Ugatsha lwe-EMA ngoLwesibili luqalise umkhankaso lo ngesikhathi kubuthene izakhamizi zeMbembesi, esigabeni seMguza, eMatabeleland North.
Umhlangano lo uhlanganise iziphathamandla ze-EMA lenduna uNdondo ukuze kuxoxwe ngendlela zokuzilungiselela lamanyathelo okumele athathwe ukuvikela umphakathi ngesikhathi sokuvikela ukutsha kweganga.
I-EMA ithe induna zidlala indima eqakathekileyo ekuvikeleni imvelo njengoba bengabagcini bomhlabathi njalo beyingxenye ebalulekileyo ekufundiseni uzulu ngokunakekela umhlabathi lokulandela imithetho yemvelo.
Umhlangano ugxile ekuqiniseni ukubambisana phakathi kwe-EMA lomphakathi ukuze kuvikelwe imlilo yeganga, eqhubeka idala umonakalo omkhulu elizweni lonke.
I-EMA ikhuthaze uzulu ukuthi ahlale eqaphele njalo alandele yonke imithetho ephathelane lemlilo yeganga ngesikhathi lesi.
Inhlanganiso le iphinde yaqinisekisa ukuzimisela kwayo ukusebenza ndawonye lezinduna zomdabu.
“Ngokusebenza ndawonye singavikela imvelo yethu, silondoloze inotho yemvelo njalo sivikele izizukulwane ezizayo kumonakalo odalwa yimlilo yeganga,” kutsho i-EMA ngoLwesibili.
