Online Reporter
Ethel Ncube
ZIKHAKHAMELE izakhamizi zakoChireya, eGokwe kulandela ukuhudulelwa kwamaxhegu amabili enkundleni yenduna uChireya esetheswa icala lokubulala abantu esigabeni ngombane.
Kuzwakale ukuba amaxhegu la, uTimothy Lunga loSvosve okungasatholakalanga ibizo lakhe, abaleminyaka ephezulu kwengu-70 bachazwe ukuganga kwabo ngenye inyanga ebihlanza isigaba lesi.
Kuvele ukuba kulabantu asebafayo bebulawa ngumbane amaxhegu la awuthengisa ngemali engange US$150.
Ababili laba kubikwa bavumile ukuthi bathengisa umbane loba bengasachazanga okunengi “ngebhizimusi” labo leli.
Kukhangelelwe ukuba baphenduke edale mhlaka 5 Mabasa.
Induna uChireya ichaze ukuthi ababili laba baphambanise ukuthula esigabeni.
“Lokhu obekusenziwa ngamadoda la womabili yikuganga okumangalisayo. Umkhuba ofana lalo asiwufuni esigabeni sethu ngoba baphambanisa ukuhlaliseka kunye lokuthula emphakathini,” kutsho induna uChireya.
Inyanga ebihlanza isigaba iveze ukuthi ababili laba yibo abenza umbane babuye bawuthengisele abantu abayabe bexabana, okuyikho okubangela ukufa kwabantu.
UMthunywa uzwe njalo ukuthi ukuna kwezulu okuqhubekayo yikho okubangele ukuthi ibhizimusi lalaba ababili “likhule” okuze kwancedisa ekubanjweni kwabo.
Kubikwa amadoda la abelungisa umbane abuye awuthengisele izakhamizi ebezisithi zingawusebenzisa kufe abantu.
Kukhangelelwe ukuthi mhla wokuthonisiswa kwecala bachaze ukuthi umbane lo bebewenza njani.
Umabhalane wenduna uChireya, Chenjerayi Chidzivo uveze ukuba ababili laba bebebhadalisa izakhamizi i-US$150 ukuze bathengiselwe umbane njalo bekuthi lowo ojongiweyo ungamkhutha nxa ebuyela esiyadinga omunye bekukhangelelwe ukuthi ubhadale enye imali.
