Online Reporter
UBUYA ngamandla kwezokulingisa uFana Mokoena owayeyilunga lePhalamende elimele i-EFF njengoba esezolingisa indawo ephambili kufilimu eza kuNetflix lonyaka.
Lumlingisi owazakhela udumo emidlalweni okubalwa kuyo iGenerations, Scandal! leminye, uzobonakala kufilimu i-180.
KuNetflix kubhalwe ukuthi iza lonyaka lokuthi izakuba lihola elilodwa lemizuzu engu-34.
Ngokwe-Actor Spaces, ifilimu iveza ingcindezi zansukuzonke zeNingizimu Afrika ngokubheka indaba kaZak.
Ngaphandle kukaFana, abanye abalingisi abazakube bedlala izindawo eziphambili ngoDesmond Dube, Prince Grootboom, Warren Masemola loBongile Mantsai.
Ungena kulifilimu nje, ngoMpalakazi nyakenye kwethulwe enye kuShowmax lapho uFana ebelingisa indawo ephambili khona.
Kulifilimu, iMasinga, uFana udlala indawo yesangoma uMolombo.
I-Masinga yaqotshelwa eKwaZulu-Natal laseLondon.
Abanye abalingisi abaphambili kuyo ngoHakeem Kae-Kazim, Abdul Khoza, Warran Masemola, Brandon Auret, Mbuso Khoza labanye. Ngaphandle kwe-180, kuNetflix baphinde baqinisekisa ukuthi intandokazi yohlelo lwabo lwakwamanye amazwe, iLove Is Blind, iza kuleli.
Kulo umdlalo abantu abangelabo abathandana labo basuke bezofuna uthando. Bakhuluma ngaphandle kokubonana. Uma sebekulungele, bathembisana umtshado okuyilapho beqala khona ukubonana.
Babesebezikhipha isonto lonke ukuze bazane kangcono. Baphinde bathole ithuba lokuhlangana labangani lomndeni wezithandwa zabo ezintsha.
