Online Reporter
Innocent Kurira, eseBarbourfields
Chicken Inn 1-0 Simba Bhora
IQEMBU leChicken Inn litshengise ukuzimisela okukhulu linqoba iSimba Bhora nge 1-0 emdlalweni weCastle Lager Premier Soccer League odlalelwe eBarbourfields Stadium, ngoLwesithathu.
Ibhola elehlukanise amaqembu womabili lihlohlwe nguLynoth Chikuhwa ngomzuzu wesi-18 ngemva kokuba uFrancis Mostafa etshaye ibhola elidale ukudideka kunozinti weSimba Bhora, uWilliam Thole. UChikuhwa ugijime walithela emambuleni.
IChicken Inn ibikhanya ilawula umdlalo esigabeni sakuqala somdlalo loba iSimba Bhora layo ibisiza ngomfutho kwesinye isikhathi. Ekuqaleni kwesigaba sesibili somdlalo, izivakatshi zibuye zilamandla zidinga ibhola lokulinganisa.
UHarrison Masina weSimba Bhora ukhuthe ithuba elihle ngemva kokudideka esebhokisini, wacina etshaya ibhola laphuma eceleni.
UMpumelelo Bhebhe wenze umsebenzi omkhulu ngemva ngokuvimba ibhola eliyingozi ngesikhathi umdlalo ususiya emaphethelweni.
Umdlali weChicken Inn uSefu Louisom ubesezama ukuvala umdlalo ngokupheleleyo ngomzuzu wokucina kodwa unozinti uThole wavimba kuhle. IChicken Inn iphinde yafaka ibhola enethini kabili kodwa unompembe uMhaka Magare wawala womabili amabhola.
Ekucineni, ibhola likaChikuhwa lanele ukuthi iChicken Inn ithole imiklomelo emithathu aqakathekileyo phambi kwabalandeli bayo eBarbourfields Stadium.
Isiphetho…
