Online Reporter
Nkosilathi Sibanda
UKUQAKATHEKA kokulondoloza amasiko lemikhuba yabantu abaNsundu kuzabekwa mgceke mhla ilizwe lithakazelela i-Culture Month edolobheni lakoBulawayo mhlaka 21 Nkwenkwezi.
Umkhosi lo wenziwa minyaka yonke njalo ukuqhutshwa kwawo koBulawayo lonyaka kuzabaluleka njengoba lesi isabelo sibizwa njengesigodlo samasiko elizweni. Kulindelwe ukuthi abantu abavela ezigabeni zonke zelizwe bahlangane koNtuthu.
Kubahlali bedolobho, ukwamukela izethekeli ngaleli ilanga kuzakuba lithuba lokuvula amabhizimusi, ukwabelana ulwazi lokwakha ubudlelwano, okuyikho okumqoka kunhloso kaHulumende yokubambanisa umphakathi.
UHulumende useqinisekise ukuzimisela ukuqhuba lumkhosi nanko iKhabhinethi isiveze ukuba izasekela ukuqhutshwa kwawo.
IZimbabwe inanza iNational Culture Month ekhokhelwa njalo yiNational Arts Council of Zimbabwe.
Ukuqhutshwa kwalumkhosi kulandelana lelanga le-Unesco World Day for Cultural Diversity for Dialogue and Development, elinanzwa minyaka yonke mhlaka 21 Nkwenkwezi.
Umkhosi walonyaka uqhutshwa ngaphansi kwesihloko esithi: “Diversity and Creativity: Advancing Vision 2030 Through Cultural Expressions.”
Obambe isikhundla sikaMphathintambo wogatsha lwe-Information, Publicity and Broadcasting Services uNqobizitha Mangaliso Ndlovu uthe iKhabhinethi yamukele njalo yasekela amalungiselelo omkhosi weNational Culture Month.
“IKhabhinethi yamukela njalo iyasekela imisebenzi ehlelwe yiNational Culture Month kaNkwenkwezi 2026”, kutsho uMphathintambo uNdlovu, ophinda abenguMphathintambo wogatsha lwezamabhizimusi lokuthengiselana.
Uthe umkhosi omkhulu uzabanjelwa enkundleni yeBarbourfields.
Uthe umkhosi lo uzananzwa njalo lakwezinye izabelo.
“Inhloso yikulondoloza lokuveza ukwehlukana kwamasiko esizwe, ngasikhathi sinye sikhuthaza ukubambana, ukuzwana kunye lentuthuko kwezomnotho kusetshenziswa ezobuciko lamasiko.
“Imikhosi le izagoqela imidlalo yamasiko evela kumaqembu emigido yesiNtu, abezomculo labanye,” kutsho uNdlovu ngeviki ephelileyo ngemva komhlangano weKhabhinethi.
Ngaphandle kwalokho, kuzaba lokwehlukeneyo okuzabe kuqhutshwa inyanga yonke kaNkwenkwezi ezigabeni zonke zelizwe okugoqela imigido, umculo, amafilimu, amabhayisikopo, ezokuloba, inkondlo, ukudla kwesiNtu, ingxoxo zexhiba ezikhokhelwa nguNkosikazi kaMongameli uMama u-Auxillia Mnangagwa.
