Online Reporter
Lovemore Dube
UNOMPEMBE ohlonitshwa kakhulu kuleli, uBrighton Chimhene usenxuswe ukuthi abengomunye wabonompembe abazaphatha imidlalo kumqhudelwano we-Africa Cup of Nations (Afcon), eMorocco ngoMpalakazi.
Ukuphakanyiswa kukaChimhene, esiya kunkundla eziphezulu kumncintiswano wamazwe e-Africa, kuze ngemva kokubamba kuhle imidlalo akwenzileyo kuminyaka edluleyo.
Unompembe lo ungomunye wabalutshwane kuleli asebathola ithuba lokusebenza kuzinga leAfcon leWorld Cup. Ngokubizwa ku-Afcon, uChimhene utshengise ukuthi uyawazi umsebenzi njalo kuyabonakala ukuthi laseZimbabwe bakhona onompembe kuzwa. Owakhe umsebenzi uwufezile kuCastle Lager Premier Soccer League lapho abethi angatshaya impembe, kungabi lomuntu okhononayo.
Unompembe lo bekuvame ukuthi abambe imidlalo yeCosafa leminye ephansi kodwa kumncintiswano we-Afcon uphiwe ithuba lokuthi atshengise akwenzayo labanye abazingcitshi e-Africa.
Omunye unompembe wakuleli oseke wafika kumabanga emiqhudelwano yaphezulu nguBrighton Mudzamiri, owazifaka kumbali yomdlalo ngokubizwa ngo2002 ukuthi azogijima eceleni ephathisa onompembe kuWorld Cup.
UChimhene ungomunye kwabalitshumi lane (14) abazabe bekhangela imidlalo le kuvidiyo, bephathisana labasenkundleni ekuhleleni izigwebo. Umbiko lo wokubizwa kukaChimhene ukhutshwe yiConfederation of African Football ngoLwesibili. Omunye okhethiweyo, ovela eningizimu ye-Africa nguLetticia Viana oweSwatini. Imidlalo yeAfcon izaqala mhlaka 21Mpalakazi, iphele mhlaka 18 Zibandlela ka2026.
Onompembe abazasebenza loChimhene:
Lahlou Benbraham (Algeria), Mahamoud Ashour (Egypt), Brighton Chimhene (Zimbabwe), Haythem Guirat (Tunisia), Hamza El Fariq (Morocco), Hossam Azab Hagag (Egypt), Abdalazi Yasir (Sudan), Ahmed Abdlrazg (Libya), Sadou Ali Brahamou (Niger), Mimisa Dickens (Kenya), Babacar Sarr (Mauritania), Djibril Camara (Senegal), Letticia Viana (Eswatini), Maria Pacquita Rivet (Mauritius).
