admin
Intatheli kaMthunywa
ABADLALI besizwe kuqembu lama-Under-17 elamantombazana abasoze bakhohlwa isiphatho esibi abasinikezwa yinhlanganiso ye-Zimbabwe Football Association ngesikhathi belungiselela imidlalo yabo leBotswana.
Kuyavela nsuku zonke ukuthi abadlali laba, kubikwa kabadli kuhle njalo balala sengathi basempini kodwa besenkambeni yokulolongela ukudibana leBotswana.
Ngokudingisisa kwephephandaba likazulu, ama-Under-17 la ebegcinwe esikolo se-Eveline, awazange athole usizo olufanele iqembu elidlalela isizwe. Abafakazi abaqotho bancwebe uMthunywa indlebe ukuba ukuhlala kwethimu bekungekuhle, okuyikho okwadala ukuthi iZimbabwe inqontshwe 6-0 kumidlalo emibili.
Kubikwa ngemva kokudlala le-Botswana ngeSonto edluleyo, inkokheli okwakumele zikhangele ngempilakahle yabadlali kubikwa zadliwa ngumswenya, zitshiya iqembu, lingela muntu omdala eduzane.
Phezulu kwalokhu, kuhambo lokuya eGaborone, ngokutsho kwabafakazi abaseduzane lodaba, inkokheli zeZifa ezithile zalwa, okwasuka kwabalihlazo phambili kwabadlali.
Inengi labadlali laba lileminyaka engaphansi kwetshumi lasikhombisa yokuzalwa.
Enkambeni ye-Eveline, kulobufakazi obuvela kubadlali ukuthi kwasekukompunzi idla emini, kungela okhangela ngokuhlaliseka kwabadlali besizwe.
Loba isikolo se-Eveline silezakhiwo ezingcono kulezinye izikolo, akucaci ukuthi kungani lenkokheli zingahlalanga khona malanga wonke. Umaneja labanye abaphathi kucatshangelwa ukuthi babesemahoteleni akoBulawayo.
Kumbali yenguqu yeZimbabwe, akula qembu eseliphathwe luklubhu njengaleli elama-Under-17.
Omunye wabadlali okhethwe ukungaqanjwa ngebizo uthe kwakungcono iZifa ithi bahlale emakhaya abo kulokuthi ibalambise esikolo se-Eveline.
“Asisoze sakukhohlwa ukuhlala endaweni leyana. Ukudla kwakuphuza ukuza kithi njalo kwakufana lokuthi sidla emagabheni. Ngazibonela ukuthi ukudlala inguqu eZimbabwe yikudlalisa isikhathi ngoba akulanto emnandi ngakho,” kutsho lumdlali.
Omunye umdlali ofunda kwesinye isikolo esilodumo kwezemidlalo uthe: “Abadala bahamba bethethisana indlela yonke sise-Botswana. Kwasiyangisa ngoba kwakumele basihloniphe lathi njengabadlali.
“Kwakubuhlungu ukuthola ukuthi sihlale e-Eveline siphinde sikhumbule emakhaya ethu. Ukudla kwangekhaya kwakungcono kulalokho ababesinika khona.”
Imizamo yokuxhumana lo-Bryton Malandule owayengumkhokheli ophezulu kulungiselelwa imidlalo le, yehlule. Ucingo lwakhe belungadojwa.
Isikhulumi seZifa uXolisani Gwesela laye ubengabambeki.
Kusenjalo, kukhanya iZifa ikhethe ukuthi yethule umbiko wayo ekhasini layo lobulembu kulandela ukukhokhona kwabazali mayelana ngesiphatho sayo.
Kubeyimpi engapheliyo sekukhitshwa imifanekiso eveza ukuthi iZifa yavoxa udaka ebantwaneni.
Kulomzali otshayele uMthunywa ucingo ekhuluma ngesiphatho esibi kubantwababo.
“Kuyini abayithola ngokuphatha kabi abantwabethu? Okunengi sikuzwa ngabantwana ukuthi babesidla ukudla okungafanelanga, kungcono sale labantwabethu phela,” kutsho umzali womdlali obike ngokucunuka kwakhe ngodaba lweZifa.
Online Reporter