admin
UMDLALI we-Lamontville Golden Arrows, uDivine Lunga, ulokhe elinde ithuba lokuthi ayedlala kuqembu laphetsheya lakhathesi.
ULunga ngumdlali oyibamba emuva kwesenxele njalo ungomunye wabadlali abahlala besehlelweni lukamqeqetshi uSteve Komphela.
Umdlali lo uqale ukukhuluma ngephupho lakhe lokuyadlalela emazweni ngesikhathi efika eSouth Africa njalo ngaleso isikhathi wayesanda kuqeda ukuzama ukukhankasela iqembu lama-Warriors kunkezo ye-Africa Cup of Nations (Afcon) e-Egypt nyakenye.
Kuvele ukuthi emuva kwalumqhudelwano ubefunwa liqembu leTurkey kodwa i-Arrows yacina isala laye. Lokhu kwenzeke ngesikhathi sinye uTeenage Hadebe ethengiswa yiKaizer Chiefs kuYeni Malatyspor, yaseTurkey.
“Emuva kwe-Afcon belikhona iqembu leTurkey ebelingifuna kodwa uyazi ukuthi konke kuya ngesikhathi lethuba. Nxa kungesona isikhathi sakho uMdali uzokuvulela eminye imnyango ngelinye ilanga. Angazi kwenzekeni ngendaba yemali labaphathi. Kodwa kulungile, libhola,” kutsho uLunga.
Ukuphunyukwa lithuba lokuyadlala phetsheya kutsho ukubambezeleka kwephupho likaLunga ofisa ukulandela abanye bakhe abathola amadlelo aluhlaza emazweni.
“Ngesikhathi ngiqala ukudlala ibhola eZimbabwe ngafuna ukuzodlala eSouth Africa ngoba lapha kuleligi enhle. Inengi lamaqembu aphetsheya ayakwazi ukukubona uma ulapha kulaseZimbabwe.
“Lapha ngifuna ukuzozibonakalisa ukuze ngibonwe ngamaqembu aphetsheya. Ngifisa ukwenza kangcono kulisizini njengoba umqeqetshi ehlale etsho ukuthi kufanele ngiqhubeke lapho engicine khona ngesizini edluleyo. Ngiyazi ukuthi akulula. Kufanele ngikwenze mina.
Ngingawelela phetsheya nxa ngidlala lapha ku-Arrows. Akekho owayezitshela ukuthi ngingaya ku-Afcon. Abantu abanengi bamangala ukuthi kwenzeke kanjani. Kodwa kuya ngesikhathi lethuba,” kutsho uLunga.
Ngempelasonto edlule i-Arrows itshaywe yiKaizer Chiefs nge 1-0 emdlalweni weligi ekuhambeni. Sekulesikhathi uKomphela ekhala ngamathuba abangawasebenzisi beliqembu abona kuyiwo abenzele phansi kulisizini.
Umgadli uKnox Mutizwa uhlala ebalwa phambili kwabahlulwa yikuhlohla amabhola alula kuBafana Bes’thende.
“Inkinga yethu yikuthi sithola inqwaba yamathuba sehluleke ukuwasebenzisa.
“Ngeke ungene enkundleni uzitshele ukuthi ufuna ukugeja amabhola. Kodwa kufanele senze kangcono phambili kwegedi,” kusho uLunga.
Online Reporter