Sidumisile Mabena
Mthabisi Tshuma
ABACULI abadabuka eMatabeleland South bazakhokhela ekujabulise abantu emkhosini wokugubha uzibuse lonyaka.
Umkhosi lo uzabe useMinda Primary School esigabeni seMatobo, Matabeleland South mhlaka 18 Mabasa njalo kuzaqhunsa abaculi abanengi abadabuka kulindawo.
Umkhosi walonyaka uzaqhutshwa ngaphansi kwendikimba ethi: “Zim@46: Ukubambana kanye lokuthuthuka kubhekwe Umbono ka2030 (Unity and Development Towards Vision 2030).”
Ekhuluma ngemva komhlangano weKhabhinethi ngoLwesibili, UMphathintambo wogatsha lwe-Information, Publicity and Broadcasting Services uDokotela Jenfan Muswere, uthe amalungiselelo aqhubekela phambili njalo uqinisekisa impumelelo yalumkhosi.
Uthe amaqembu ezokuzijabulisa akhethiweyo abalisela Ufasimba-the Home of Arts, Indosakusa (The Morning Star), Ndolwane Super Sounds, Mavusani, Chimurenga Vocalists, Macrey Super Sounds, labanye.
Ukukhethwa kwabaculi laba kutshengisele ukuzimisela kukaHulumende ukuphakamisa ithalenta lakulindawo.
Kubaculi, umkhosi kazibuse ulithuba lokubonisa ithalenta labo phambi kwelizwe baphinde bavule amathuba okuthi bathole udumo olukhulu kunye lokuthuthukisa imisebenzi yabo.
Online Reporter