Online Reporter
YiNtatheli kaMthunywa
KULENDODA eleminyaka engu-23 yokuzalwa yeGokwe egwetshwe udilikajele ngemva kokugamula uyisemkhulu (82) qede iyomngcwaba duze lomuzi wangakibo izama ukufihla icala.
Umsolwa uBlessed Nyashadzashe Mapulani wavukela uyisemkhulu uJoel Manyevere oleminyaka engu-82 yokuzalwa wesiqintini seMugahwa Village ngaphansi kwenduna uJiri, eGokwe South wambulala ngesihluku ngokumgamula.
Kubikwa umsolwa wahlahlela uyisemkhulu ngehloka kane – kanye esifubeni, kabili entanyeni lasehlombe andubana ayemngcwaba.
Omakhelwane baqala ukuba lensolo bebona bengamboni uManyevere kungazakali lokuthi wayangaphi ngapha kubonakala igazi ligcwele egumeni.
Amapholisa enkambeni yeManoti yiwo athola umzimba wakhe bucwadlana lomuzi wakhe kunye lehloka elasetshenziswa ukumbulala ligcwele igazi.
Umzimba wakhe wahlolwa esibhedlela se-United Bulawayo Hospital lapho okwavela khona imbangela yokufa kwakhe ebalisa ukulimala kwezitho zomzimba ezitshiyeneyo okuyibufakazi bokuhlukunyezwa akwenziwayo.
Umehluli womthethwandaba omkhulu obeseGokwe ngesikhathi esethula isigwebo sakhe usole kakhulu lesi senzo wathi lesi yisihluku esingelangqonndo esenziwayo kutshengisa ukungahloniphi impilo yomuntu. Ukulwa lomuntu omdala ongakwanisi ukuzivikela kupha isijeziso esinzima kakhulu. Kungakho umsolwa ugwetshelwe ukuhlala ejele impilo yakhe yonke.
Kusitatimende se-National Prosecuting Authority of Zimbabwe (NPA) abomthetho ngeke bavumele isihluku esinje.
“Umthetho ngeke uvumele isihluku esinje sokuhlukumeza umuntu omdala njalo ongaselamandla. Isigwebo lesi sikhumbuza ukuba umthetho uzahlala uvikela impilo zabantu,” kuphetha abe-NPAZ
