Udinga usekelo uNdlovu

Ellina Mhlanga

OFUNA ukuba ngumsekeli kamongameli weZimbabwe Olympic Committee, uFredrick Ndlovu ubike ukuba ukuphumelela kwelizwe kumincintiswano yamazwe kugxile ekuphakamiseni inhlanganiso zemidlalo.

Uthe ngaphandle kokwenza lokhu, angeke ilizwe lenelise ukuthola imendulo kumidlalo yama-Olympics. UNdlovu uthemba ukuthi uzavotelwa esikhundleni sikamsekeli kamongameli weZOC, kukhetho oluzaqhutshwa ngeSonto, eRainbow Towers eHarare.

Wake wabangumsekeli walinhlanganiso ngo-2021.

“Ngicabanga ukuthi kunengi okumele sikwenze njengenhlanganiso. Enye yenhloso zethu bekuyikuba labagijimayo abalitshumi emidlalweni yama-Olympics yaseParis ka-2024. Ngibona ukuthi sazama kulokho, loba singafezanga inhloso le ngokugcweleyo. Ngakho-ke, ngifuna ukuqinisekisa ukuthi ngisekela zonke ingatsha, sikwenze lokhu silungiselela imidlalo ye-LA 2028,” kutsho uNdlovu.

Uqhubeke wathi: “Kusobala ukuthi lokhu akusimsebenzi we-ZOC yodwa. Abagijimela ilizwe bavela kunhlanganiso ezitshiyeneyo ngakho kudinga ukubambisana.

Ngomnyaka odluleyo, abagijimela ilizwe, uTapuwanashe Makarawu loMakanakaishe Charamba bafika kuhlandla lokucina le200m, kumidlalo yama-Olympics nyakenye.

UNdlovu ukhangelele ukuthi akhulumisane lamabhizimusi alakho ukuncedisa inhlanganiso yeZOC.

“Okwesibili, ngifuna ukuthi ngidonsele amankampani eduzane. Ukuze sifeze konke esikuhlelileyo, kumele sithole usekelo lwemali.

“Okunye njalo yikuthi silungisise inhlanganiso yeZOC, sibone ukuthi ibayisibonelo esihle kwezokuphakamisa ezemidlalo.”

Kuminyaka edluleyo, uNdlovu uke wabayinkokheli kuZimbabwe Volleyball Association. Uthe kunengi akufundayo esaphethe isikhundla sikamsekeli kamongameli weZOC.

Abafuna ukuvotelwa ku-ZOC:

Umongameli: Thabani Gonye, Ringisai Mapondera.

Umsekeli kamongameli: Xolisani Gwesela, Merit Thokozile Munzwembiri, Fredreck Ndlovu, Vengayi Cleophas Nyangoni, Joe Kudzayi Rugwete, Godfrey Tichakunda Sunguro, Tendayi Tagara.

Amalunga ebhodi: Charmaine Yemurai Chamboko, Abel Chimukoko, Letitia Chipandu, Edson Chirowodza, Tinashe Duri, Xolisani Gwesela, Abigail Mnikwa, Merit Thokozile Munzwembiri, Lizzie Mupure, Joe Kudzayi Rugwete, Tawanda Sithole, Tendayi Tagara, Fungai Happiness Zinatsa, Chipo Zumburani.