Online Reporter
Yintatheli kaMthunywa
KUQHEKEZEKE udwetshu phakathi kukaMadlela Sikhobokhobo loSikhosana Buhlungu kulandela ukungezwani phakathi kwabo kubangwa imali.
Lokhu kuvele kuvidiyo esabalala kunkundla zokuxhumana lapho uSikhosana athi ucabangela ukuthi uMadlela lo-Abednigo Sikhosana badla imali yakhe ayifakelwa kunkundla yeGoFundMe ngenhloso yokuthi athengelwe imota.
UMthunywa uzwe ukuthi uSikhosana ubesefakelwe imali engange US$ 210 kodwa yena kasazwisisanga ubenakana ukuba uselemali efika iUS$ 400. Kubikwa uSikhosana wathi ephathekile emzimbeni wacela ukuphiwa imali le ukuze ayethenga amaphilisi kodwa labo ababezama ukumqoqela imali yokuthi athengelwe imota bala yena wasechothoza ethi badla imali yakhe.
Kungxoxo abe layo lentatheli kaMthunywa, uMadlela uthe yena loSikhosana kabasasebenzi bonke.
“Kuliqiniso ukuthi mina lobaba uSikhosana asiseyi kusebenzisana. Lokhu kubangelwe yikuthi ngathi ngikhuluma laye ngimbikela ukuthi sesivala isikhwama seGoFundMe ngoba imali ingasangeni.
“Ngesikhathi sivala leso sikhwama kwakulemali engaba yi US$ 210 angazi kumbe ekukhulumisaneni laye ecingweni angabe engasazwisisanga ngoba yena ubesethi imali yakhe yi uS$ 400 angazi ukuthi wayesekuthatha ngaphi lokhu,” utsho njalo.
“Kusukela lapho vele uSikhosana ubesezitshela ukuthi sadla imali yakhe kukanti sasilombono nje wokuba athole imota engamsiza ngemali yansuku zonke nxa kuyikuthi kwehlule agejelwe umgodi ukwenzela ukuthi abelima ethengisa athole ukuziphilisa lemuli yakhe.
“Iqiniso yikuba uSikhosana ubevele engenzi’mali eyangaphi ngokuhlabela kwakhe kodwa besihleli sisenza amacebo okuthi simsize athole okokuziphilisa.
“Sikhuluma sisenzenje inkomo azinikwa ngabantu sokusele ezimbili kuphela angazi ukuthi kwahamba njani. Wabuye waphiwa njalo lemali yokuthi athenge imbuzi, kala ngitsho leyodwa esibayeni,” utsho njalo.
Uthe uzamile konke akade engakwenza kodwa usehlulekile. Lokhu okokuthi kasafuni kusebenza lami ngiyakwamukela, sengisima lapha. “Mina akula ngitsho imali engayidlayo eyakhe, mina bengincedisa njengomuntu wakithi ukuthi afeze amaphupho akhe.
“Ubengaze akhulume kubi ngami ebantwini bengingelandaba ngifisa ancediseke kodwa lamuhla ngibeka ijogwe phansi usekhulile uzazibonela njengendoda.
“Okwakhathesi okwami loSikhosana sokwanele,” kubika uMadlela
Enkundleni zokuxhumana, kuFacebook abalandeli bakaSikhosana baveze ukuba ukhona otshele uBuhlungu okungayisikho.
“Umuntu umsize usebenza gadalala ekucineni akubonge ngokukuhlambalaza ngemva kohambo olude lolu,” kubika omunye kunkundla zokuxhumana kuFacebook.
“Umuntu kasizeki sokuhlangana lokungabi lesikolo. Sengothi akuhambe wena etsho ebantwini abamzama kangaka. Imali zakhe ziphi kkkk. Lemali ye-UK leyo wayicelelwa,” kutsho omunye njalo kuFacebook.
“Msizeni umdala bakithi, lingamyeki eduha zamani ukumbonisa. Kusobala ukuthi kukhona abantu abalomona asebemtshelela eceleni njalo abangeke bamsize ngalutho kusasa. Akulanto ayaziyo umdala, uzwa nje ngabantu.
“Umdala lowu mina ngambona kudala ukuthi uphambili nge1hr.
“Lami ngilegazi lomvundla sekubhalwe Sithule mxxh. Sokulesandla semfene lapha ngiyazi kukhona oyedwa kumbe ababili abangenza into embi leyi. Ngubani orekhoda uSikhosana?”
UAbednigo Sikhosana ubengomunye obencedisana loMadlela ekuncedeni uSikhosana Buhlungu njalo nguye owaphuma lecebo lokuthi njengoba uBuhlungu efuna imota ancediswe kuvulwe i-GoFundMe.
Imizamo yokuxhumana loSikhosana Buhlungu ecingweni yehlule ngoba ucingo lwakhe lungangeni.
