Online Reporter
YiNtatheli kaMthunywa
AMAPHOLISA koBulawayo asesole ukwanda kwamacala odlame lokubulawa kwabantu, ekhuthaza uzulu ukuthi azithibe, ananzelele ikakhulu lapho okunathwa khona utshwala.
Lokhu kuza ngemva kokubikwa kwamacala okubulala emalokitshini eMagwegwe North laseCowdray Park kumaviki adluleyo lapho okusetshenziswe izikhali ezigoqela amahloka, ingqamu lemikhonto.
EMagwegwe North, kulezigebengu ezigqekeze kwenye indlu lapho ezixhonxe khona indoda ebilapho. Indoda le icine isedlula emhlabeni esibhedlela seMpilo.
Elokitshini leCowdray Park kubikwa amadoda amathathu akade ethwele amahloka, ahlasele amanye amabili kwenye ibhawa, kwabulawa oyedwa.
EMagwegwe North kwabulawa uMongiwethu Godknows Dube obeleminyaka engu-26 yokuzalwa. Kukanti eCowdray Park kwabulawa uZibusiso Tshuma (22).
Isikhulumi samapholisa koBulawayo u-Inspector Nomalanga Msebele ukhiphe umbiko ngezehlakalo lezi.
Mhlaka 6 Lwezi 2025 ngehola letshumi ebusuku, uMongiwethu Godknows Dube wayelomngane wakhe benatha utshwala kwenye ibhawa. Bahlangana lomsolwa uKeith Dube okubikwa wasuka wabathela ngotshwala.
U-Insp Msebele uthe ngehola lesine emadabukakusa, uMongiwethu lomngane wakhe batheleka endlini kaKeith bafika lapho bangena ekamelweni bamkhiphela phandle baqala ukumtshaya. UKeith wahlaba umkhosi edinga usizo, kwaze kwafika enye indoda okuthiwa nguNkosi.
UNkosi lo kuthiwa wagwaza uMongiwethu emlenzeni lasekhanda. Unina kaMongiwethu wathola umbiko wokulimala komntanakhe, owafika wabiza i-ambulance.
“Wabiza i-ambulance kodwa wedlula emhlabeni esibhedlela seMpilo,” kuchaza u-Inspector Msebele.
Uthe ukubulawa kukaZibusiso Tshuma kwenzakala mhlaka 7 Mpalakazi. Kubikwa wayenatha utshwala lomngane wakhe oleminyaka engu-18 yokuzalwa ngehola lika-12 emini. Balandwa ngamadoda amabili ayethwele ihloka, aziwa ngokuthi nguGii Love loHenry.
“Abasolwa babagijimisa, bahlala uZibusiso izithende baze bamfica, bamtshaya ngehloka kanengi nengi emzimbeni. Wafela khonapho,” kutsho u-Insp Msebele.
U-Insp Msebele ukhuthaze umphakathi ukuthi wenqabele ingxabano ezidala ukulahleka kwempilo.
“Sikhuthaza umphakathi ukuthi uxazulule ukungezwani ngendlela efaneleyo endaweni yokuthi kube lodlame. Sibeke isixwayiso njalo esokuthi abantu batshiyane lokuthwala izikhali eziyingozi.”
