Online Reporter
Ethel Ncube
KUDABA oluhlasimulisa umzimba kufe indoda kwenye ibhawa eseNkenyane, esigabeni seBubi esabelweni seMatabeleland North, kulandela ukulwa ngemva kokungazwanani kubangwa isitulo sokuhlala.
Kubikwa ukuthi uKillion Ndlovu oleminyaka yokuzalwa engu-45 waxabana losengumuyi, uZibonile Mpofu oleminyaka engu-40 mhlaka 21 Lwezi ngesikhathi besebhawa bebanga isitulo.
UMpofu loNdlovu babenatha utshwala kodwa basebexabana kubangwa isitulo. UMpofu kubikwa watshaya uNdlovu ngempama yena owabisela ngokumtshaya ngesibhakela entanyeni.
UMpofu wawela phansi, watshaya ngekhanda Ababili laba balamulwa ngabanye ababezinathela ebhawa le. Kubikwa wavuka lapho, waqonda emzini wakhe.
Indaba le yabikelwa amapholisa, uMpofu wahanjiswa esibhedlela lapho adluliselwa khona eMpilo afika walaliswa wadlula emhlabeni ngeSonto.
Isikhulumi samapholisa koBulawayo uInspector Nomalanga Msebele ubike ukuba indaba enjalo isemapholiseni.
“Sibophe uKillion Ndlovu osolelwa ukuba ulesandla ekufeni kukaZibonele Mpofu. Sikhuthaza uzulu ukuba angathathi umthetho awubeke ezandleni zakhe kodwa abathole indlela ezothileyo yokuxazulula ingxabano,” kutsho uInsp Msebele.
