adminJohas Moyo
ZISELE zinkemile izakhamizi zeTsheli esigabeni seNkayi kulandela isihluku esenziwe ngelinye inina okucatshangelwa ukuba lafakela umkalo ongumsekeli kamphathisikolo itshefu ngoba esehlanyisana ledlalicatsha.
Imbedumehlwana le etshiye izakhamizi zitshwaqe umzimba yenzakale kuviki ephelileyo lapho umuyi, obengumsekeli kamphathisikolo weTsheli Primary School uReuben Dube okucatshangelwa ukuthi ufakelwe itshefu ngunkosikazi wakhe okutholakale ukuthi nguMaMoyo nje kuphela.
UMthunywa uzwe ukuthi umetheswacala wezwa udletshana lokuba umkakhe usethandana ledlalicatsha okutholakale ukuba nguMaSiziba nje kuphela okwabangela ukuthi baxabane.
Kucatshangelwa ukuba umuyi ngalelolanga wayekhangelelwe ukuthi aye koBulawayo kungakho umkakhe wathi kumele bahambe bonke kodwa kwehlula ngoba umuyi wayefuna ukuhamba lomakhwapheni wakhe.
UMthunywa uxoxisane loMnumzana Bhekani Ndlovu oyisakhamuzi sakuleyondawo yena oveze ukuthi balokhe bengakholwa indlela umuyi abhubha ngayo nanko phela kagulanga kodwa abakwaziyo yikuthi wafa ngemva kokunatha amahewu.
“Sicabangela ukuthi umuyi angabe wafakelwa umuthi ngoba wayeke waxabana lomkakhe ensukwini eziphelileyo.
Kuthe umuyi njengomsekeli kamphathi wathunywa ukuyabhadala imali ye-examination fees koBulawayo kwaphinda kwalavuka njalo impi phakathi kwakhe loMaMoyo yena owala laleyo mali.
“Kukhanya ngalesosikhathi kusaliwa kwaphinda njalo kwangena umlayezo kumakhalekhukhwini uvela kumakhwapheni kaDube ebuza ukuba ungaphi,” kutsho uMnu Ndlovu.
Uqhubekele phambili wathi kukhanya umuyi waphiwa amahewu ngumkakhe wawanatha engakasuki kanti wayesezithezele olulenkume ngoba wahle waqunywa yisisu.
“Okusolisayo njalo yikuthi uMaMoyo ebona lokho waya komakhelwane watshiya umuyi equnywa yisisu waze wathwalelwa ekilinika kodwa wafika wadlula yikho nje sicabangela ukuthi wamfakela itshefu,” kutsho uMnu Ndlovu.
Omunye umfakazi ongumbalisi ubikele uMthunywa ukuthi kungabe kuliqiniso ukuthi uDube wafakelwa.
“Isidumbu sikaDube sahanjiswa koBulawayo ukuyahlolwa imbangela yokufa njalo kukhanya wabulawa yitshefu,” kutsho umbalisi lo ongathandanga ukuqanjwa ngebizo.
UMthunywa uxhumane lesihlobo sikamuyi uMnumzana Sikhosini Tshuma ongumfowabo kamuyi oveze ubumunyu lokudabuka ngalindaba.
“Sethuka sesitshelwa ukuthi uDube kasekho njalo okunye okusikhathazayo emoyeni yikuthi nxa sibuzisisa siyethuselwa kuthiwa sizabotshwa.
“Kangisatholanga ithuba lokuzwisisa udaba lwakhona kodwa lanxa sambeka sikholelwa ukuthi wafakelwa umfowethu njalo wafa buhlungu,” kutsho uGolide.
Imizamo yokuxhumana lesikhulumi samapholisa esabelweni seMatabeleland North uSergeant Namatirai Mashona yehlule.
Bongani Ndlovu