admin
Johas Moyo
KULOMLISA weNyamandlovu olomlenze osuphosa ufane lowendlovu nanko phela kucatshangelwa ukuthi kukhona owamphosayo ngoba izakhamizi ezinengi zikhonona ngokuthi udla inkomo zazo.
Kuzwakale ukuthi bedlula itshumi abantu abacula ngoma yinye yokudlelwa inkomo ngumlisa lo kukanti kuthiwa ezinye wayezithatha ngudlu endaweni ezitshiyeneyo okwenza abantu bazonda kakhulukazi yikho nje kucatshangelwa ukuthi yikho okwenza umlenze wakhe ungakhangeleki.
UMthunywa uvakatshele umlisa lo uMnumzana Charlos Moyo wamthola ehlezi phansi esenwaya umlenze wakhe lo athi esikhathini esinengi awubuhlungu kodwa udinga ukwenwaywa njalonje.
UMthunywa uxhumane lomunye wezakhamizi zakuleyo ndawo okhethe ukubizwa ngelokuthi Mnumzana Mabhena nje kuphela wabika ukuthi umlisa wamdlela inkomo zakhe ezedlula itshumi njalo wamupha kuyimali emcele ukuthi ayemthengela inkomo ebalungwini njengoba kungumsebenzi ajwayele ukubenzela wona kanti usedlelwe inkomo lezo.
“Samupha imali sibathathu sisithi ayesithengela inkomo kubangane bakhe abelungu njengoba kwakusaziwa ukuthi esigabeni nguye owandise ukuphathisa abantu abafuna ukuthenga inkomo nanko phela uyaziwa ngabantu abanengi njalo ungumkhokheli wethu.
“Okusizwisa ubuhlungu yikuthi kasazwakali ukuthi wazisa ngaphi inkomo lezo kodwa ukhala ngomlenze njalo ucabangela ukuthi silesandla kulokho kukanti kasazi lutho zinyembezi zethu kuphela,” kutsho uMabhena.
Esinye njalo isakhamuzi esale ukuqanjwa ngebizo sithe kulukhuni ukwamukela ukuthi imali yakho idliwe ngumuntu kuphelele emoyeni nje.
“Mina angazi ukuthi ngiqale ngaphi kodwa labo abathi umlisa waphoswa bangabe beqinisile ngoba banengi abakhala ngemali kumbe izifuyo zabo.
“Mina inkomo lezi esasithe asithengele zona zangabuyi zingizwisa ubuhlungu impela kodwa ngiyake ngicabange ukuthi mhlawumbe akulamuntu owamloyayo yibuhlungu bezinhliziyo zethu nje obumenza ahlangane lamashwa anje. Akulunganga ukwenza kanje umuntu eyinkokheli emphakathini,” kutsho lesi sakhamuzi.
Kuzwakale njalo ukuthi umlisa lo vele usehlala engena engozini ezingapheliyo kusukela ngesikhathi abantu baqalisa ukuthonisa inkomo zabo azidlayo.
Kubikwa kuviki ephelileyo ubhewuke ngemota wasila kuleyo ngozi kodwa imota ihle yafa.
Intatheli ixoxisane lomlisa uMnu Moyo wavuma ukuthi uphathekile emzimbeni ngenxa yomlenze wakhe owaqalisa ubuhlungu njalo sokulesikhathi imhlupha leyo ndaba.
Uthe udubo lomlenze lwaqala lapho abantu beqalisa ukumgcona ngokudla inkomo zabo lwahle lwadla ubhedu unyawo khathesi alusangeni lasemabhulugweni.
“Kuliqiniso sibili ukuthi ngavuvuka umlenze njalo lakhathesi ulokhe uvuvuka usiya phambili. Sengake ngayalaliswa kanenginengi esibhedlela seMpilo kodwa odokotela bathi ababoni lutho.
“Into enzima yikuthi kwaqalisa ngize ngixabane labantu abathi ngadla inkomo zabo. Khona imali ngayiphiwa ukuthi ngibathengele inkomo kodwa ikhiwa lasuka lahamba lingangiphanga inkomo lezo njalo akukho engingakwenza.
Khathesi bangifuna ngifile, sengihlala ngihlangana lengozi ezitshiyeneyo,” kuphetha umlisa uMoyo.
Online Reporter