adminCornelius Luphahla
KULOMDIKONI webandla leSeventh Day Adventist Church wesigabeni seMathuphula eTsholotsho obotshwe ngamapholisa elomgodla we-2kg obulembanje.
UMdikoni lo, uKhulumani Moyo ubotshwe ngoLwesithathu kuviki ephelileyo ngemva kokutholakala ethengisa imbanje emdlalweni wedili lokuzalwa komntwana wesinye isakhamuzi.
UMthunywa uxhumane loMnumzana Dan Nkomo oyisakhamuzi sakule indawo walandisa ngokubotshwa kukaMoyo.
“Amapholisa esigaba ezwa udletshana lokuba uMoyo uthengisa imbanje njalo mhlalokho wayezithengisa edilini.
Kungakho amapholisa amlanda esiyambuza yena ngokudliwa ngumzwangedwa wahle wacela ezinyaweni kodwa bambamba emzini wakhe sezama ukuzifihla.
“Esebanjiwe wazama ukubafumbathisa kodwa abazange bavume bahle bambopha. Ngemva kwalokho bayahlola esivandeni sakhe semibhida bathola ezilimile. Bathi bembuza ngazo wathi kayisuye owazilimayo zalinywa ngumzawakhe osowabhubhayo,” kutsho uMnu Nkomo.
Ekhuluma lentatheli uNkosazana Belinda Mathuthu uthe uMoyo nguye owazilimela imbanje zakhe njalo ubesezithengisela labantwana abancane.
“UMoyo wazilimela imbanje zakhe sevala ngokuthi ngezikamuyi. Ngitsho ngoba uhlala ezithengisa seze ethengisela labantwana abancane okwenza ukuthi bengasahloniphi. Ngabe ngezikamuyi ngabe kudala wabikela amapholisa njengoba umzawakhe selenyanga ezintathu wabhubha.
“Okungimangalisayo yikuthi ungumdikoni ebandleni leSabatha kodwa wenza izinto eziphambene ngitsho lokholo lwakhe,” kutsho uNkszn Mathuthu.
UmkaMnu Moyo, uNkosazana Sibongile Ncube ebuzwa ngale indaba uvumile ukuthi yenzakala wathi kodwa imbanje lezi zazingayisizo zomkakhe.
“Kuliqiniso sibili ukuthi umkami ubotshiwe ngemva kokutholakala elembanje kodwa kayisizo zakhe zatshiywa zilinywe ngumzawakhe owabhubhayo. Lathi sasingakwazi ukuthi uzilime ngaphi kwakhona zaze zabonwa ngamapholisa.
“Noma nje umkami watholakala ezithwele kodwa kwakungayisizo lezi ezazilinywe ngumzawakhe,” kutsho uNkszn Ncube.
Imizamo yokukhulumisana lesikhulumi samapholisa esabelweni seMatabeleland North yehlule.
Online Reporter