adminYiNtatheli kaMthunywa
UFatha weRoma owabangela ukufa kwesihambi ayesithwele emoteni yakhe ngemva kokuba bebekungozi kubangelwa yikuthi uFatha lo wayegijimisa imota okwedlulisileyo utshelwe ukuba ekele ukutshayela imota njengesidakwa ngumatshi wenkundla yeHwange.
Umantshi kulinkundla uNkosikazi Rosemary Dube uthe uFatha Adolf Wisdom Simwinde oleminyaka yokuzalwa engu-34 njalo engumfundisi eSacred Heart Mission eJambezi, indawo eseHwange akumelanga abonakale etshayela imota okwenyanga eziyisithupha wengezelela wathi afunde ukutshayela imota njengomuntu ohloniphekayo hatshi njengesidakwa.
UFatha Adolf ubekhangelane lecala lokubulala.
Umantshi uthe ahlawule imali engange $100 kuthi nxa engehluleka ukukwenza lokhu aye ejele okwensuku ezingu-15.
“Njengomuntu ohloniphekayo emphakathini sikhangelele ukuba nxa uzatshayela uhlele uhambo lwakho kulesikhathi ukuze ungagijimi njengesidakwa. Nxa ungehluleka ukukwenza lokhu sizakuthi ungumtshayeli ongahlelekanga kumbe sithi awazi ukutshayela.
“Njengomkhokheli wezokholo kumele ube yisibonelo emphakathini ungatshayeli imota njengesidakwa ngoba lokhu kuzakwenza wehle isithunzi. Zama ngamandla onke ukuzithiba nxa uthe wezwa usugijimisa imota okwedlula amalawulo,” nguNkkz Dube lo.
Kubikwa mhlaka 27 Ntulikazi nyakenye uFather Adolf wayetshayela imota yohlobo lwePeugeot 504 esuka eVictoria Falls esiya eHwange. Phakathi kwemota kwakulabantu ababili ayebathwele, uBothwell Ndlovu loVusumuzi Ncube. Bathe sebezafika kunyathelo le 366km peg kumgwaqo osuka koBulawayo usiya eFolosi uFather Adolf owayegijimisa imota kakhulu wehluleka ukubamba imiqobotsho yemota okwabangela ukuthi iphume emgwaqweni andubana ibhewuke. Abantu ayehamba labo balimala kodwa umfundisi lo kazange alimale ngitsho lakancane.
UNcube owayelimele kakhulu wagijinyiselwa esibhedlela seMpilo lapho afika wabhubha khona.
Ekhulunyelwa ligqwetha lakhe uElvis Mashindi weDube and Company ecela uzwelo kumantshi uFatha Adolf uthe waphathisa imuli kamuyi ngemali engange-$400 ngesikhathi ebekwa njalo wabhadala indleko zesibhedlela ezabakhona ngesikhathi omunye owayesemoteni uNdlovu esesibhedlela seMpilo.
“Umsolwa ngumuntu ongasebenziyo kungakho-ke kalandlela yokuthola imali uzitholela imali engange $50 evela kubandla. Sicela inkundla imzwele nanko phela kazange achithe isikhathi senkundla elandula icala lakhe kodwa wahle walivuma. Kulusizi ukuba ingozi le yenzakala njalo kwalahleka impilo yomuntu kodwa indawo okwenzakala ingozi le igcwele amagodi njalo lokhu kwabangela ukuthi umsolwa ehluleke ukubamba imota ngesikhathi ingozi isenzakala,” nguMashindi lo. Obetshutshisa nguOnias Nyathi.
Online Reporter