Online Reporter
UMPHAKATHI usele wethukile kulandela ukuzwa ngokufa kowesifazane weSouth Africa okubikwa ufe ngenxa yokuthi ubehlala edidla inhlabathi.
Ukufa kukaNthabiseng Mabusa kubangele izingxoxo ezinkulu kanye lezixwayiso ezintsha ngengozi zokudla izinto zendabuko ezinjengehlabathi elibumba, eyaziwa endaweni yangakibo ngokuthi yi-mmu.
Ngokutsho kwabangane abaseduze kanye labomakhelwane, uMabusa ugule kakhulu okwensuku eziyisithupha ngaphambi kokukhothama kwakhe. Labo ababemzungezile babike ukuthi ubetshaya izimpawu ezitshaqisayo, ezigoqela ukuphuma kwegazi elinengi ngenyanga, ukuqunjelwa okukhulu, kanye lokuphelelwa ngamanzi emzimbeni—konke lokhu kukholakala ukuthi kuhlobene lokudla kwakhe isikhathi eside inhlabathi.
Umngane kamuyi owale ukuqanjwa ngebizo uthe abesibhedlela babike ukuthi “izitho zangaphakathi zikaMabusa bezingcolile.” Lokhu kuchazwe yilabo abaseduze laye njengempumela oqondileyo njengoba bonke bebesazi ukuthi ubehlala eidla inhlabathi.
“Ngizwa ubuhlungu ngokwenzakale kumngane wami kodwa kusukela lamuhla angisayidli inhlabathi.
Umngane lo ubuye walandisa ngokuvakatshela umngane wakhe okokucina okubuhlungu, eveza ukuthi ngosuku olwandulela ukufa kwakhe, uMabusa utshele izivakatshi ukuthi uzizwa engcono. “Izolo siyembona uthe uzizwa engcono. Besingazi ukuthi uyahamba,” kubalisa umngane, emkhonzela ngamazwi athi, “Lala ngokuthula, Sisi.”
Isehlakalo lesi sithumele ukwethuka, sakhuthaza abanengi ukuthi bahlolisise ukusetshenziswa kwemikhuba enjalo yendabuko. Izazi zezempilakahle zivame ukuxwayisa ukuthi ukudla ubumba olungelulo lokudla kungabangela ubunzima obukhulu bezempilakahle, okugoqela ubuthi bensimbi, ukuvaleka kwamathumbu, kanye lokungcola okuvela kumagcikwane ayingozi kumbe izilokazane.
Ukufa kukaMabusa kutshengise umdeni wakhe, abangane, kanye lomphakathi wonkana bengakholwa, okuvusa izingxoxo ezintsha ngemikhuba yendabuko evame ukudluliselwa phansi kungela lwazi ngengozi zayo ezingaba khona kumpilakahle. Lanxa ukudliwa kwe-mmu kusenziwa kabanzi kweminye imiphakathi—ikakhulu ngabakhulelweyo kumbe labo abalangazelela ukunambitheka kwenhlabathi—abezempilakahle sekulesikhathi eside bekhuza ngakho.-Ubulembu
